GENERAL SANTOS -- Patay na nga nahidangat sa balay-tambalanan ang usa ka sakop sa Philippine National Police (PNP) nga nadestino sa General Santos City Police Office (GSCPO) human gipusil sa iyang ulo sa wala pa mailhing suspetsado sulod sa usa ka bar sa Roxas Avenue sa dakbayan sa General Santos, ala 1:30 sa kaadlawon kagahapon.

Wa kagawas ang bala sa ulo sa biktimang si PO1 Alfredo Pinque, 23, molupyo sa Purok 4, Barangay Malalag Cogon sa Malungon, Sarangani Province human siya pusila sa suspetsado kinsa gihulagway lamang nga taas og buhok, naka-jacket og blue kinsa misibat sakay sa usa ka motorsiklo nga gimaneho sa wa sab mailhing lalaki.

Sa inisyal nga imbestigasyon sa Pendatun Police Station, ang biktima, kinsa sakop sa SWAT (Special Welfare and Tactics Unit) sa GSCPO, nag-inusarang nag-inom sulod sa Tambayang Pinoy Videoke Bar sa Roxas Avenue sa siyudad.

Samtang tua sa sulod sa videoke bar, usa ka lalaki, kinsa gibana-banaang 40 anyos ang pangidaron, mibutho ug sa wa'y daghang istorya, gipusil ang biktima sa iyang ulo haduol sa iyang wala nga mata.

Sumala sa mga nakasaksi, ang lalaki, midali-dali sa pagsakay sa usa ka motorsiklo nga wala'y plaka nga gimaneho sa usa ka lalaki ug mipasirit og padagan sa wa matinong lugar.(Super Balita General Santos)