GIKUMPIRMA sa pamunuan sa Davao del Sur Provincial Police Office (DDSPPO) nga “pulitika” maoy unang motibo sa paglabay og granada didto sa balay sa pamilyang Mirafuentes niadtong Huwebes sa gabii.

Ang 12 anyos nga si Milky ug iyaan niini (ngan gitago) nasamdan dihang kalit nga nibusikad ang usa ka eksplosibo didto mismo sa ilang tugkaran pasado alas 7 ang takna sa gabii.

"Maayo na lang gani kay nasangit dapit sa tubo sa kanal kay og wa pa didto gyud tugpa duol sa pultahan diin nagtapok akong mga manghod," sulti sa maguwang dalaga sa biktima nga wa na magpaila.

Duha ka mga tawong nagsakay og motorsiklo ang kalit nilabay sa granada ug tulin nga nisibat sa wa pa nibusikad ang granada.

Gidason sa igsuon sa biktima nga dako ang ilang panaghap karon nga dunay kalambigitan sa pagpusil patay sa iyang ginikanan niadtong Septyembre 9 ang paglabay sa granada.

Gipamusil patay sa mga de motorsiklong mamumuno sila si Henry ug Brenda Mirafuentes samtang pauli na unta sa ilang balay nga lulan sa ilang motorsiklo niadtong higayona.

"Gusto gyud mi nila hutdon karon mao ni gibalik-balikan mi. Kadto sila si papa ug mama kanhi to trabahante sa munisipyo unya lagi kay duna silay nahibaloang mga binuang diha mao gipusil, naa pud gani mga binuang nga negosyo," pag-angkon sa igsuon sa biktima sa Sun.Star Superbalita.

Si Police Senior Superintendent Ronald dela Rosa, provincial police commander, nikumpirma sa panaghap sa pamilya nga usa ang bikil sa pulitika nga ilang gitutukan sa kasamtangan.

"Kadto man gud gipamatay, gigunitan to og mga pulitiko unya kini laging usahay mobalhin-balhin ta og amo so pwede gyud nga ipapatay ta og pulitiko," sulti ni Dela Rosa. ((Orlando B. Dinoy/Sun.Star Superbalita Davao/Sunnex)