SUGOD ugmang adlawa, Enero 1, nagkadaiyang New Year’s resolution ang atong madungog sa katawhan.
Ang uban moingon nga di na manigarilyo, maghubog-hubog, mamabaye, ug tanang dautang buhat – biyaan na sa pagsud sa bag-ong tuig.
Apan, ang uban nga gwatsinanggo, modayon pag-ingon nga iyang biyaan ang tanang bisyo – ang di lang mabiyaan mao ang pagpamakak.
Ang pagbiya sa mga bisyo sagad matuman natong mga yanong tawo. Apan sa mga politiko, dako ang akong pagtuo nga di gyud ni mahimo.
Ngano? Tungod kay naanad na sila sa haruhay nga kinabuhi (pwera hinuon sa maayong politiko).
Kay kinsa bay maghuna-huna nga di na mangurakot nga hapit naman sab ang eleksyon? Mao nga kutob sa ilang mahimo, ila gyung himuon aron modaug sa eleksyon.
Usa sa simpleng pangwarta nila (di hinuon tanan) mao ang pagkaltas sa sweldo ug bonuses sa ilang mga empleyado.
Ngano? Tungod kay mangyawat nga daku-dako ang matiba-tiba.
Ang uban nila (sa makausa pa, di hinuon tanan) didto sa peace and order fund motira.
Ila kining gihimo aron segurong duna gyuy ipalit og boto sa eleksyon. Panahon sa eleksyon, nagkadaiyang saad ang ilang isulti ngadto sa ilang mga constituents, lakip na dinhi ang mga pobre uyamot nga mga lumad.
Apan duna bay kaharuhay ang kinabuhi sa mga lumad? Usa sa akong higalang lumad ang nagsulti nga usa sa iyang panghinaut nga maapil unta sila sa New Year’s resolution sa ilang mga tribal leaders, mga konsehal, kongresista, ug uban pang opisyales sa gobyerno, kana bang prayoridad sila sa mga programa sunod tuig.
Suma niya, maluoy siyang magtan-aw sa iyang mga kaliwat nga mangayo og pinaskuhan sa mga tawo tungod kay daw mga makikilimos sila nga milugsong dinhi sa patag.
Iyang gitug-an nako ang ilang kalisud sa bukid tungod kay ang ilang mga yutang kabilin gitikad naman sa mga adunahan (uban nila mga politiko) didto sa Marilog District.
Tungod kay wa namay yuta nga matikad, ang uban nila manghurnal nalang sa mga nakapalit sa ilang luna.
Siya nagtuo nga kung gipanalipdan lamang sila sa mga tribal leaders, inabagan sa mga politiko, di mahitabo nga di moasenso ang ilang kinabuhi sa bukid.
Tinuod ang gisulti ni Jun nako kay mao ni ang akong nasaksihan didto sa Barangay Salumay, Marilog District, diin makita nato ang mga nindot na kaayong resorts, apil na dinhi ang dakong luna nga gipanag-iyahan sa among paryente.
Maayo unta kon mapatalinghugan kini sa atong mga politiko, maapil sa ilang New Year’s resolution ang paghatag og konkretong programa alang sa mga lumad. Sa ngalan sa Super B family, ako manghinaut sa usa ka Mabungahong Bag-ong Tuig natong tanan!