Garcia: Ing pamikaluguran (Friendship)

“E ku bitasa nung apanaligan da ka inya tatakut kung sambitlan la ding panamdam lalam ning pusu ku---sasarilinan ku na la mu.
Buri da kang akakaluguran, at akakalaguran la mu naman. Buri keng ibusni ing pusu ku karing sabla at paslagan ing pali ning lugud lungub niti.

Click here for Election 2010 updates

Buri da kang akakaluguran, at akakalaguran la mu naman. Buri keng ibusni ing pusu ku karing sabla at paslagan ing pali ning aslag-aldo lub niti.

Dapot kakarug kung e mu ku luguran nung pakit ke ing tune kung lupa; tatakut kung ka’ku e ka makipagkaluguran nung e ku magkumwaring dakila.

Pampan ning malati karinan ding lagyu, tungkula’t kule; pauli ning e tutung sarili – e ko akakit ding ka’kung kapatad.

Buri da kang akakaluguran, at akakalaguran la mu naman. Buri keng ibusni ing pusu ku karing sabla at paslagan ing lugud ning Panginwan lub niti.”

-Siddha,“Kakaluguran”, Dalit meyangu king“Banayad a Sikanan”

***

Ing pamikaluguran panibatan ne ning tula at kapasnawan. Metung yang santungan ning metung a taung mangaylangan pali ning pamikaluguran a e binang marayu king lugud. At maralas mimigit ya pa king lugud o pamalsinta.

Iti ya ing mengari king salilungan king pali at dimla ning uran o agya mang ing sigwa. Ing tune kakaluuguran papalto ya’t ayasaan king panaun ning sigwa at saring kasakitan. E me man awsan o lapitan – magkusa yang daratang bang ipagkalub na ing keyang saup nu man anti, nu man karitak o karakal.

Manyaman king lub na ing pamanyaup king keyang kakaluguran a misaldak king nanu mang kaligaligan. Mengari ya iting talasagip king pangalumud ning pakamalang kakaluguran. E ya man manayang kapalit king nanu mang aysaup nang kapasnawan –pamakirame o nanu mang bage kaylangan ning keyang kakaluguran.

Nung magkasakit ya, antabayanan ne’t pakasnawan; nung masakit ya – pantun neng panulu; nung mangaylangan ya – sawpan ne; nung magkamali ya – ituntun ne agya mang e na akakit a para king kayapan na niti o agyang kamwanan ne pa; nung misakab ya italakad ne’t ulwan sugat. Nung panasakitan de reng aliwa – ipanglwalu ne king sablang agyu na makananu man kapanganib. At e ya man manenayang kapalit king sablang pagkalub nang suyu at pakamal king keyang kakaluguran.

Sumangid niti ing e tune kakaluguran kabaligtaran ne ning tune kakaluguran. Ing tune kakaluguran malungkut ya nung ing kakaluguran na misasakab ya king keyang bye. Ing e tune kakaluguran – papalakpak ya’t magsaya king pangasusub na ning keyang kakaluguran at mimwa ya’t lulungkut nung magtagumpe ya’t midirinan galal ing keyang awsang kakaluguran. Sibi-sibi ya nung pupuryan de iti at masosora yang bina.

Nung mumuna yang diling pupuge ing tune kakaluguran, tatawli yang dili nung mamye ya mang papuge ing e tune kakaluguran. Magsangkan-sangkan ya pang e na balu ing pamagtagumpe niti. At nung pumuge ne – pautang na pa lub ing pamamuge na.

Masisibuk ya iti king panaun ning lusuk a pamangaylangan ning keyang kakaluguran. Neng magigipit ya ing kakaluguran na sasalikutan ne o maglingad yang agyu nang ipagkalub ing saup. Nung atin ya mang balung makasaup kaya, isalikut na pa niti o ituru ne pa iting lumapit karing mekad mamakarine kaya.

Ing tune kakaluguran o kakaluguran mu kabud, uling nung e tune e ne man malyaring ituring kakaluguran talaga, metung yang sula o mal a pibandyan a malyaring panaligan king panaun king kagipitan o mabayat a pamangaylangan. Mengari ya king makakutkut a gintung maragul aysaup at ing e tune kakaluguran mengari yang lasun a kesa king apaldanan na ka ya pang ikasakit o ikamate mu.

Ing kakaluguran, binit nang iyapse ing sabla nang agyu bang mung asopan ne ing keyang pakamalang kakaluguran a mangaylangan king kasawpan na – bye, pusu at kaladwa. Ing kabaligtaran niti – kalingkingan na man e ne buring kimut bang makasaup king mangaylangan a mituturing a mayap a kakaluguran kaya.

Makikilala yang masalese ing tune at e tune kakaluguran king panaun ning sigwa o tagumpe.

King “Dalit ning Kakataskatasang Panginwan” mayayakit ing nung makananung ing Apung Ginu metung Yang bina kakayap a kakaluguran. Ing Keyang lugud kekatamu alang panenayang kapalit. King bye na naman ning Ginung Yesukristu atatangalan tamu ing Keyang tibubus, alang salat at alang salang pamipakamal karing Keyang kakaluguran – itamu.

Malapit na ing Maleldo at manyaman pigunaman ing masampat a lugud ning Apung Ginu kekatamung sabla. Keng tutuking Duminggu – aldo da na ring palaspas at kilub ning paruminggung ita sana aganaka ta Ya at e kalingwan liyus ning sablang e-kaylangang pamisalang-salang. Sana tune pamikaluguran at pamikalugud namu ing lumaganas.

***

Nung nanu man ing mali king Kapisik ayni, agkatan da kayung paralang sisti o pamitulid. Malyari kang magparalang sulat o mambag kawatasan, kapusungan, balita, munikala o sisti. Parala mu kabud o iyaus king kek’ong talasuyung talasulat king text o cp: 0919-6940-224 o king email: garciakragi@yahoo.com. Ipisik me, abe!!!