TINULID ku king tukuran
ning erang e makatuklu king gabun;
susukdul king babo
ning buntuk kung mikasbu.
Mibwang anting sabo
ning nasing megadtu,
tutun ding gamat a sawil
king tungkulang akagisingan;
akasanayan at akaparan
keta pang malaut nang mekalingwan
a kayanakan
a sabi da misan mu daralanan.
E tutu, nganang apu mu.
Dapot salang king kangatba
ning kalaraman ing memanlag
king silim ning melibo munag.
Ginapak king salimpe pigkalub na
ning palsintang gewa nang sukab
ning pamangaynipan.

Sun.Star accepts donations for victims of Typhoon Ondoy

Manik ku’t dumalo king milabas
a ngeni ku pa asaksyan.

Mekad, pete na mu ning pamanyakwil;
O lepastanganan ning alang lunus
a pamangalingwan…
king ulaga ning panalala,
inya sa’t akalimbatawan
ding pakatuknang busal
ding marimla dang salu.

E ku na talusayan pa
nung nanung kerasan
ning pamagpampan karing alino
mikasat karing panimanman
ding alang nanu mang pamigunam…
dit mu man. Ala!

Dit mu man.

Wangis ning kuran a nipnap da bangi
ring menglub a bulan,
e mu metung,
e mu misan,
king kapitangan ning ugtung aldo.

Minye tibak karing mapaglimbun
dang kamalitan.

Wa…mekad ding sugat mu
nanaknak la pa.

Sasayung mengari king agta
ning melaplap a sapwa
gewa rang lamu
king kasagsagan ning kaleldo.

Misan mu man sana,
ibalikid me ing batal mung pepasyas
ning kaparatutang bunga
ning kelan mung belwan
king kabaldugan
ning kababawang singlalam ning gamus
ding kuku mung katabas-tabas pa.

Ding talukap mung mata
kakablas la karing kaslak
a sing-tuling ding galingaldo
dapat dang tidtud. Sana.

Masa ka king tipan
a mekatapilan nang dalan
selungatan ning kelang masabal
king maging suli ning kadalamatan
king pamaglingad…
a meging senayan
mung alang pamiyaliwa
king pamangurap;
o pamangisnawa;
o pamangutud karing balang kakaliwa
king kabaluktutan.

Ala namang bage e adarakap
ning pamanenaya.

Ngayu.

Lalabul na ing amyam
a manibat ngeni king mawli.
Paralaya’t paroba
tutuldu re ing pangulu
king pamangilag king alaya.

Ding sibul mu gagapang la karin…
Pakatapak, mengari karing magsalbat
arap ning dambana ning kapagkumwaryan.

Sasamban ye pala i Sinukwan!

Karin, mekad agamit do
king aliwang bage
ring karelang intud.

E mu kabud king pamangusad
at pamanyalake tingka ning pamisamak,
nung e king pamibulalag king kapanaligan king pisak.

E mu na pikakarine,
Aminan mu…
Ikang inuma ring pigkamalyan
kung libung tugak – dapot…
Kamamalu la pala!
Nu da ku daralan?
Nu da ku susulagpo?

Dadalipakdak na la
ding palikpik!
Ing lanam at sekat
yang magkalub tula karela.

Kekayu…
at karing sablang pesitagun
king burul ning katapatan.

Katapangan.

Magmatuling, magpaldas ka!

Kamaganak kang mapanako.

Ale?

Pasibayu, makatadwa pa –
tulauk la ring barag
a minakmul karing sablang tatso
kabang makabalikid ya ing bante
at ing pasbul mibusni yang anting tukal king susi ning pamipamun king dulum.

Ding balang sudsud maswe la
king pusad ning alawli.

Kawatasan ka waring ating tipan
karing sukad at sunis?

Batas ding pamisip itang pepaskad
ning anting lura ning ketasang-lub

Kukusad anting kamandag
king kalubkub ding dungus ra.

Paukyat king kalibutnan
ning kapanwalan karing mala-bulak
a pamangamanu.

Malambut.

Maputi.

Dapot…
dinilat ubingan.

King pilubluban mu,

Ating bage mengari
king kapanaunan
a magpatiktik liyus
king pamagluglug
at pamamalipit.

Kapad mu, ne?

Mamin na ka.

Angusan mu ing alimum -
ilumud mu no ring asan!
-Impunsigwa, 11-06-2009

***

Nung nanu man ing mali king Kapisik ayni, agkatan da kayung paralang sisti o pamitulid. Malyari kang magparalang sulat o mambag kawatasan, kapusungan, balita, munikala o sisti. Parala mu kabud o iyaus king kek’ong talasuyung talasulat king text o cp: 0919-6940-224 o king email: garciakragi@yahoo.com. Ipisik me, abe!!!

Published in the Sun.Star Pampanga newspaper on November 8, 2009.