Garcia: Nung Pilpyaru ka Kanita at Pengari na ka Naman Ngeni

Saturday, January 28, 2012

“SASALAMIN mu naman ing tiru da reng pengari mu;
Isalamin da naman iti ring sablang asupling mu.
Gulisak ka ma’t mangangis, tumulu ing lwa at pawas,
pulisan mu ma’t kumkuman, panamdaman mu rin ing kaplas.”

-- Miguel Serrano, ‘Salamin”, Sunis 6

Have something to report? Tell us in text, photos or videos.

“Pauli ning ing mayap a impun e ya mamungang marok a bunga,
at layun ing marok a impun e ya mamungang mayap a bunga.

Pauli ning ing balang impun makikilala ya kapamilatan ning sarili nang bunga…

Ing mayap a tau manibatan king pibandyan na king pusu na lulwal ing kayapan; at ing marok a tau manibatan king marok a pibandyan king pusu na lulwal ing karokan.

Pauli ning nung nu manibatan ing kasaplalan na ning pusu na ing asbuk na magsalita ya. Dapot o bakit awsan mu kung “Ginu, Ginu’, at e mu tatalukyan ing sasabyan Ku?Ninu mang lalapit Kanaku,at makirandam ya karing Amanu ku at tatalukyan na la, pakit Ku nung ing sanu ing kawangis na: Wangis ne ing taung mitatalakad bale,a kinulkul malalam at mibiling asyas king batu. At inyang ing albug mitas na, ing agus binarug yang asna kabinit king bale ita at e ne apatugun, pauli ning makabalangkas ya iti king batu. Dapot ing taung mekarandam at ala yang gewa, wangis ne ning taung mitalakad bale king gabun a alang balangkas, kaniti ing agus merug yang asna kabinit; at kabud n’ya mu miragsa. At ing pangalasak ning bale ita asna kabinit.”

-- Lukas, Dangka 6, Sunis 43-49

*****

Inyang mura ya pa ing katawan kung ini, wangis ning mura mu namang kwayan,
ing panakit ku karing pengari ku mengari la mung talapatupad karing batas a e ku naman kikilalanan at tatanggapang lubusan. Panakit ku kanita, sumbagal la king kanakung kaburyan, karing pyalung ku at king tula ku.

Tatakut ku king taiktik da, palmura o parusang malyaring gawan da kanaku nung atin kung agawang salungat king kaburyan da. Wa, mamintu ku karing utus da at e ku gagawan mu naman ing babawal da, dapot pauli na mu ning tatakut kung mapalmura o mabarug o miparusan king nanu mang paralan.

Kabud migulut na la o nung ala ku king arapan da, e ku na tatalukyan ing batas o kautusan da. King pilubluban ku bala matula ku pa at pakiramdam ku makayablas ku karela agyang makananu mu. King pilubluban ku, mimwa ku karela. King pilubluban ku kasaman ku la agyang pota mung kasalungsungang daramdaman ku pa ing kaplas ning barug, tampaling o sagap da o aksing ning palmura at pangaral da.

Makanyan man, busal ning pilubluban ku daramdaman ku ing e makatud iti. E
makatud ing mimwa ku karela. Inya sa’t e ku balu nung sanu ing pamintwan ku - ila o ing kesyasan ku buntuk.

Inyang magaral ku, antita mu naman. Uling deng kanung talaturu mengari lang pangadwang pengari tamu – pasalikut mu naman ing pamanyalungat ku karela.

King pangayari ning pamagaral ku, antita mu naman. Deng makitungkulan matas kanaku lawe ku bakud la namang sala-salabat at sukat mung suklaban, lakbangan, o lundagan bang apangilagan king nanu mang batas dang e makatugma king kanakung panakit. Likas ku atang masyas a buntuk!

Mengalabas ing dakal a banwa at e ku balu deng sablang tiru da pala ding pengari at talaturu ku makakayap kanaku. E ku peulagan ing masabal da kanaku. Bala ku, masungit la kabud kanaku at buri da mu talaga ing ibawal da kanaku ing sablang buri kung daptan a para kanaku kanita makatud uling ila ring panibatan ning tula ku agyang king pilubluban ku bala ating mamala kanaku at sasabing e makatud ing gagawan ku.

Karing para kung kayanakan kanita, apipisabyan mi naman ing antita at lupa-lupa kami dapat. Lupa-lupa kaming pilpyaru’t masyas a buntuk inya sa’t sukal da kami lub ding pengari mi at pati na talaturu.

Karas ning kapitangan ning bye, ing tau, nung e ya mandatila king kesyasan buntuk at tanggap ne king kayapan at katutwan, sunlag kaya ing kayapan ning kapagnasan da pala ring pengari na kabud pengari n’ya naman at ya naman ing sasalungatan da ngeni ring anak na. Kabud ing masabal na’t lugud karing anak na misusuklyan isding at terku o kesyasan buntuk wangis na o migit pa king kesyasan na naman buntuk kanita inyang anak ya pa. Alang mumunang kapagsisyan dapot alang tawli nung ituntun mu naman nanu mang kamalyan.

Ay! Kasna ne ing pala Kapisik - inya ini namu ing pamupus…
Ing pekamasampat a kapugayan ding anak karing pengari da ya pin ing pamanaluki karing pamipaulagang tiru da karela; At ing pekamasampat a kapugayan ding baling lelangan king Kakataskatasang Panginwan ya pin ing pamanaluki da karing kaburyan na.

Masaya’t makabaldugang kayaldawan karing kanakung adwang matalik a kakalugurang Kapisik manibat pa inyang pilpyaru kaming kayanakan a lato-lato king dalan - Conrado “Boy” M. Contreras, Eneru 26, a makatuknang na ngeni king San Francisco, California at Danilo “Dan” S. Garcia, Eneru 29, a makatuknang pa mu rin kalupa ku king balen ning Makabebe. Ipisik ye, abe!

Puge mu naman karing dakilang watas/talasulat Kapampangan karing karelang
kayaldawan – Juan Crisostomo “Crissot” Sotto, Eneru 27, ning Bakulud; Eligio G. Lagman, Eneru 28, ning Wawa o Guagua; at Querubin Fernandez, Eneru 30, ning Mabalakat. Patagal puge king dakilang watas ning Kandawe o Candaba – Jose M. Gallardo – a mibait kanitang Eneru 20! Lwid kayu, watas!

*****

Malyari kang magparalang sulat munikala o sisti o mangutang dikil king
KAPISIK king aldo iti o karing milabas na. Parala mu kabud o iyaus king kek’ong talasuyung talasulat king text o cp: 0919-6940-224 o king email:

garciakragi@yahoo.com o king facebook: http://www.facebook.com/i.krag.