"NGANANG Isya king babai, “Aku ing pamisubling-mye at ing bye. Ninu mang manwala kanaku, agyang mate ya, bumye ya pa mu rin, at ninu mang mabibye at manwala kanaku e kapilan man mate. Panwalan mu ite?”
~ Wan, Dangka 11, Sunis 25-26
(Matthew 11:25-26)
“Ding kutkutan mengabusni la ngan mu naman. At dakal a katawan da ring nwan a mipatudtud tinikdo la, at king pamaglwal da karing kutkutan kaybat ning keyang pamanyubling-mye memamunta king banal a lungsud at pepakit la karing dakal. Inyang ing pekapun ding Udyus at ding abe na a magbante kang Isya, asaksyan da ing ayun at ing mengapalyari, kinasna lang kasdan at ngarang sinabi, “Kamatutwanan ing mambang ne iti ning Dyos!”
~ Mateu, Dangka 27, Sunis 52-54
(Matthew 27:52-54)
***
Samadhi. Sanskrit yang amanung mangabaldugang sari kalalam a gunam. Iti ing pekamalaut darasan da reng mibule-bule king Apung Ginu o Ibpang Kakataskatasan. Deng nwan a talasuyu Na ilang makaras kaniti.
I Isya o Yesus, anting pekadakilang talasuyu, mambang at lulugud king Kakataskatasang Ibpa disnan na ing Samadhi lakwas na inyang “pete de ning kurus”. Nung pakasuryan, panwalan tamung Dyos Ya at ala yang pamiyaliwa king Dyos. Inya nung sabya tamung mete Ya ing Dyos – binang e makatud.
Ing Dyos anting pekamayupayang dili at panibatan ning segana-ganang upaya at belwan e ya malyaring mate agyang dit mu mang penandit o agyang kapurit na ning pekakapurit ning kapurit a penandit. Ing katawan na yang mete dapot ya e ya mete agyang saguli mu o kapurit ning pekakapurit a kapurit ning penandit.
Nung mete ya agyang kapurit namu ning pekakapurit a kapurit ning penandit, e ya lubusan upaya at nung e ya lubusan upaya – e ya Dyos. Bakit? Kasi ing Dyos ing magpagalo karing sablang bage. Ya ing magpagalo king panaun mu naman at nanu mang bage gagalo.
Ya mu naman at alang aliwa a magpakimut king angin, king alun, karing sablang labwad, king api, o agyang nanu mang bage ati king sikluban o agyang lagpas pa king sikluban. Nung e na buryan, nanu mang bage e malyari o marapat. Nung buryan na, nanu mang bage marapat at alang nanu mang maka-ampat kaniti.
Ing pamanyubli nang mye ning katawan nang Isya tutu. Dapot e na buring sabyan nita Ya ing mete – uling aliwa ya ing katawan mengari kekatamu mu naman a aliwa itamu reng katawan tamu nung e ing kaladwang magpakimut king katawang pangsaguli tamung gagamitan anting saken bang arapat tamu ing buri tamu’t kapagnasan.
Ngana pin Yesus king banal a kasulatan, “Ing laman at daya e na malyaring amana ing kayaryan ning Dyos”. Dapot itamu malyari tamung amana ing kayaryan ning Dyos. Nung ali, bakit pa o’t agkatan na katamung Isya a muli king kayaryan na? O’t atin pang tipan ning pangakabus?
Aliwa itamu ing katawan o laman at katawan – itamu ing kaladwang magpakimut magpagana king katawan anti ning nung makananung ing saken paganan ne ning ninu mang magpasulung kaniti. Aliwa ing katawan ing mapakimut king kaladwa nung e kabaligtaran na nita ing katutwan. Itamu ing papabye king katawang gawa king laman at daya.
Makanyan man, ing Panginwang Isya anting Dyos Anak lakwas yang e malyaring mate agya mang sabyan ta nang Ya ing katawan. Uling ing Dyos e taya kakabas. Ing Dyos at ing katawan na ala lang pamiyaliwa. Ing Katawan ning Dyos alang-angga ya inya pin e malyaring mate agyang kapurit ning pekakapurit a kapurit ning penandit.
Subali pa king ing katawan ning Dyos e malyaring mate - ing milyari king Panginwang Isya – samadhi o kataluktukan ning pamigunam na king Kakataskatasang Ibpa.
Makabaldugang Maleldo kekatamu ngan, Kabalen!
***
Dake Talabaldugan:
1. apalya – (palagyu) mapait a gule dapot dakal a kayapan ing babye na king ikakayap ning katawan. English – bitter gourd. Alimbawa king pamangamit: “Mapait ya man ing apalya makalagu ne man o makasanting king bisa.”
2. apan – (palagyu) nanu mang kakabit king taga ning padwas o bitag. Maralas pamangan ding pakirakpan. English – bait. Alimbawa king pamangamit: “Menabu ya ing apan bayu ne pa man ayakmul ning asan ing taga.”
3. apap – (palagyu) asan a madarakap king dagat, Apahap king tagalug. English – sea bass. Alimbawa king pamangamit: “Maralas a lutu da reng Kapampangan kareng apap ing gsa king kamatis, bawang at sibuyas.”
4. apat – (panguri) ing kaybat ning atlu, bayu naman king lima. English – four. Alimbawa king pamangamit: “Apat ne mata i Iru magkasakit ya pang mamilang kareng salaping ayayabli na.”
5. api – (palagyu) metung karing limang sangkap – makasilab ya o makapali. English – fire. Alimbawa king pamangamit: “E ya dapat mamyalungan api ing ninu man nung e ya bisang mapali..”
Kasebyang Kapampangan: “Megamate sinulad”. Magagamit ya iti anting sisti keng balat o imalan a marinat at masulit nang ilako ing dusing, dinat o kibal. Alimbawa king pamangamit: “Mengamate ya sinulad ing maglolo kang Iding inya makasdan o ba’t yang apili nang maging kapalsinta.”
Malyari yang alben ing “Magdarame king Makabebe” king YouTube: https://www.youtube.com/watch?v=3F7Lm7RfeC8
***
Agkatan da kang mambag o midake nanu mang Kapampangan a kawatasan, sanese, sisti, kasuryan o nanu mang dikil king Kapampangan. Pakiparala king email address, garciakragi@yahoo.com o iyaus o i-text king +639196940224. Nung karapatdapat ya’t makayagpang king dalerayang tuntunang Kapisik, masa kang milimbag ya sanu man kareng tutuking dangka ning Kapisik. Ipisik me, abe!
r