Garcia: Pamagpusitara (Elopement) | SunStar

Garcia: Pamagpusitara (Elopement)

Time to read
3 minutes
Read so far

Garcia: Pamagpusitara (Elopement)

Wednesday, September 13, 2017

“Nung mye ku mang libung banwa, magi kung keka para karela ngan.
Nung mye kung libung banwa, buri kung magi kang kanaku karing balang metung.” ~ The Evolution of Mara Dyer – Michelle Hodkin

“Aluguran ke salang king kasangkanan, salang king pangaku, salang king kapayapan, salang king pagasa, salng king ligaya, salang karing sablang pampakayna lub a malyari.” ~ Great Expectations – Charles Dickens

"King kelang-mula-mula migpilit ku. E malyari ita.
Ding panamdaman ku e la malyaring supilan.
Sukat mu kung payntulutan sabyan ku keka nung makananu da ka
kasaring tatangalan at kaluguran.” ~ Pride and Prejudice – Jane Austen

"Nanu pang migit pa para karing adwang kaladwa, nung e ing damdaman a piyabe la kabang-bye—bang pasikanan ing balang metung karing sablang gagawan, bang paynawa king balang metung karing sablang lugma,
bang panibalan ing balang metung karing sablang kaplas, bang maging metung karing taimik a e mu asambitlang panalala king penandit ning tawling pamikawani?” ~ Adam Bede – George Eliot

“At nung ing metung karela atagmwan ne ing kaliwa nang kapitna,
ing tune kapitna ning sarili na, e bali nung makamal ya king kayanakan
o makamal ya king aliwa mang bage, ding misangga mebating la
king kapagmulalan king pamalsinta at pamikaluguran at pamibasa.” ~ The Symposium – Plato

*****

Dinalang pulis a pakabaril. Dinalang sundalus a paka-tangki. Apulung daung a pang-lumpung. Agyang pilan pang sigwa o agya man libung kamatayan alang makasabat kareng magpusitarang mikalugud. Agyang pang ligaya banwa ing kapalit o bubukal a laru ing dalanan e da pangilagan mitakas la mu sana.

Pusitara. Paralan da reng mipalsintang gagaligatsu na keng karelang pamangaylangan a miyabe na lalam ning metung a bubungan, o pamisiping king metung a dase agyang nu ya pa kalati o kagaspang at metung a kulumbu—agya man kisna yang busbus at gabak.

Masikan tagana ing igut ning pamalsinta, agyang sabyan tamu pang inya mu sasamal la uling kulang la mu gamus keng pamanggatal da. Agyampang sabyan tana, pali mu yan at malyaring akwa keng pamagbabad keng dilu. Ing kaligkig da yang magpasasal karela. Ing galigatsu da yang magpabural karing mata dang mabubulag na keng pamalsinta.

Magpusitara la reng mipalsinta kabud mikakasabat king karelang pamisamak, o pamiyabe dusuldit a bisa lang miyabe nanu mang oras at e bali nung ugtung lado o kapitangan bengi pa ing pamagdulap da king balang metung.

Maralas deng pakyalaman da reng pengari ialng magpusitara. Atin mu namang uling sasamal la. Deng aliwa naman uling atin lang buring aliwang pakasal da reng pengari para king anak da. Ngening kasalungsungan, maralas naman a mipasubu la ring mipalsinta o milamnan yang ala keng panaun ing babai.

Kanita, ing pamagpusitara malilyari neng kapitangan bengi o itang madalumdum pa bang e la marakap tatakas. King panaung iti, agyang ugtung-aldo magpusitara la reng mipalsinta at misan agyang e la man taganang maka-adya inya mipapasubu la agyang ala lang daralang salaping malyari dang agamit malambat. Inya ing malilyari makisut lang tambing agyang pilan pamung aldo ing karelang pamagpusitara.

Ating daralan keng awang. Ating daralan keng kilwal. Ating magtudtud-tudturan. Ating magkikyak-kikyakan ba’mung malaus ing balak dang pamag-pusitara. Maralas ing magdala lang piblasan a makagyu para agyang pabulan mu man. Ating panilas da’t titipunan at pupuslit ditak-ditak ba’lang e maulata.

Atin mu namang madarakap bayu la pa mitakas, kabang tatakas la pa, o agyang mekadayu na la. Makanyan man, agyang merakap la, mulit la pa mu rin anggang e la mekatakas at mekapiyabe na king metung a bubungan deti.

*****

Dake Talabaldugan:

1. kasabi – (palagyu) kasalita, akakasabi/akakasalita, katalamitan, kakasundu. English – chat mate, a contact person, someone who’s on speaking terms with another. Alimbawa king pamangamit:“Atin yang kasabi keng dalan itang kasabi ku dikil keng sasaliwan kunhg gabun inya e ke akasabi.”

2. kaság¹ – (palagyu) dala, lambat, gamit king pamanasan/pamagligo. English – lift-net fishing gear. Alimbawa king pamangamit:“Kaigut na pa mung Bisen tambing lang memaglundag deng asan a ikwa na keng mebitas nang kasag.”

3. kaság² – (palagyu) galgal, katug, kayungkung, kaligkig. English – convulsive motion. Alimbawa king pamangamit:“Kaigut na pa mung Bisen tambing lang memaglundag deng asan a ikwa na keng mebitas nang kasag.”

4. kasala – (palagyu) kaslag, kasariyan ning sala, kabinan ning sala, siri ning aslag o sinag. English – brightness, splendor, sparkle. Alimbawa king pamangamit:“E da asabi nung makananu ya kasala ring bulag ing aslag ning aldo nung e mu pauli ning pali na.”

5. kasaláy/kasalé – (palagyu) bungkus, sapunggul a bulaklak . English – raceme. Alimbawa king pamangamit:“Managtal yang kasale tulasi i Rosa ba’na lang idaun king bitisan ning Apung Ginu balang abak kaslag ning aldo.”

*****

IRIYANG KAPAMPANGAN: Masanting lang pisabyan deng alimpuyu at ding karelang kabaldugan at ing iriyang kasuglung da reti. Kapanwalan da reng kabalen tamu kanita o mekad angga man ngeni--“Deng kanung dalagang atin alimpuyu lalam matang pitulwanan lwa, malungkut la bye nung magkyasawa la.” Mapalyari mu naman kanung mate lang agad deng ayasawa ra. Makananu kaya nung adwa la pa reng alimpuyung makanyan? Keng tutuki: Alimpuyu keng lalam arung naman.

*****

Agkatan da kang mambag o midake nanu mang Kapampangan a kawatasan, sanese, sisti, kasuryan o nanu mang dikil king Kapampangan. Nanu mang kutang o sisti king misulat king Kapisik, malyaring ikutang o malinawan king talasulat. Pakiparala king email address, garciakragi@yahoo.com o iyaus o i-text king +639988948624 o +639423924399. Nung karapatdapat ya’t makayagpang king dalerayang tuntunang Kapisik, masa kang mirinang kapakibatan at milimbag ya sanu man kareng tutuking dangka ning Kapisik. Ipisik me, abe!

Published in the SunStar Pampanga newspaper on September 14, 2017.

Latest issues of SunStar Pampanga also available on your mobile phones, laptops, and tablets. Subscribe to our digital editions at epaper.sunstar.com.ph and get a free seven-day trial.


View Comments