Respeto

TUNGOD sa kahuot sa tra­pik, grabe ang stress nimo sa karsada. Mao na nga di malikayan nga dunay away sa mga motorista mao nang mosangko usahay sa maduguong hitabo ug nikalas og kinabuhi. Mao diay nga tambag sa ubang drivers nga mga beterano na sa karsada, patas-an ang pailob kon naa ka sa dan.

Kapila na ko makaengkwentro og mga driver samtang nag bike sa karsada ug nibuhat sab kog hinanggaw nga mga buhat. Dihay ka usa, nikalit jud kog brake atubangan sa usa ka PUJ nga mao pay pagdagan. Ni-brake og kalit ang driver. Kadto calculated risk nako ug kahibawo kong di maigo niya kay mao pay pagsugod og padagan.

Wa na ko makapugong sa akong kasuko kay diha siya nihunong sa no stopping sign kay duna man say pasahero nga diha mopara og kasakyan. Igo rang nagpanglingo lingo sa iyang ulo ang drayber. Akong gitudlo niya ang traffic sign. Maayo gani di siya init og ulo, di sama anang uban nga manghagad og sukmagay.

Di maayo

Kadtong akong gibuhat di ma­ayo, pero nadala ko sa emosyon kay kadaghan na ko makakita og mga drayber nga giyamayamaan ang mga traffic rule. Kana bang way tahod sa mga balaud sa karsada. Kadaghanan magpaugatay pa. Kana bitawng junction box, kanang yellow nga dunay x sa tunga sa intersection di unta angay tungtungan, mag-abot ang mga sakyanan.

Ang tumong sa junction box timaan sa panag-abot sa mga sakyanan sa nagkadaiyang mga direksyon. Unta, di ka molabang kon sa imong unahan, wa moirog ang mga sakyanan. Kana bang di ka makababag sa ubang mga sakyanan. Kon libre na ang unahan, una ka pa molabang.

Basta ang junction box kinahanglan nga traffic free. Mao na ang imong timan-an kanunay samtang ikaw ang magmaneho. The more nga motahod kita sa balaud sa trapiko, maluagan og gamay ang atong pag antos sa kalbaryo sa karsada.

Filtering

Ang akong ganahan sa mga sakyanan karon, 99 porsyento nga makaagi ang mga magbiseklita ug magmotor daplin sa mga karsada. Mohatag ang mga sakyanan og agianan sa two-wheel nga mga sakyanan. Apan duna gyuy hakog sa agianan. Apan sagdi na lang kay sa 100 ka mga driver, duna lay duha nga ingon niana. Sagad ra ba, kon di PUJ, mga taxi driver ang magbabag sa agianan.

Kaanindot unta kon kitang tanan maghuna-huna nga dunay uban nga naa sa karsada. Atong huna-hunaon kanunay nga ang karsada alang sa tanan, di kay imoha ra. Mohatag kitag agianan kon gikinahanglan.