SA akong pagsige og kuyog sa mga nagkadaiyang bike enthusiast, professional man o peraho nako nga recreational ug advocate, daghan ko og nakat-unan kabahin sa road safety. Apan ang labing importante mao ang kanunay nga pagsul-ob og helmet ug blinker, labina sa kagabhion. Mas maayo usab nga magsul-ob og senina sa gabii nga mas makita.
Akong naamguhan kon unsa kaimportante kining mga butanga karon nga kada adlaw na kong naggamit sa scooter. Daghan sa mga nagbiseklita nga neglected ning mga butanga nga unta, alang kini sa kaluwasan nila.
Tungod sa kasuwaw sa mga suga sa kasugat nga mga sakyanan, pun-an pa sa kakuwang sa kusog sa kahayag sa mga sugang dagitabnon, lisod nga makit-an dayon ang mga nagbiseklitang nag-una.
Ang mga awto ug uban pang four-wheel nga mga sakyanan dunay mga suga sa likod aron mas makita sila sa gabii. Unsa na kaha kon biseklita? Busa, ang biseklita kinahanglan butangan og blinker sa likod, diha sa seatpost o mas maayo, kon ang rider mismo, magkabit og blinker sa likod sa iyang helmet. The higher, the better ang visibility sa nagsikad. Duna man gani mga tail light ang mga sakyanan.
Naay uban, ari ibutang ibabaw lang og gamay sa ligid. Mas maayo nga medyo ibabaw kini ibutang aron mas daling makit-an.
Padaplin
Usahay, makakita ko og biker nga naa sa tunga sa dalan. Usa ka higayon, sayo ming nanglakaw sa akong asawa kay duna mi tambungan. Nagsakay mi og taxi ug sa dihang, hapit madasmagi sa drayber ang usa ka biker nga naa sa tunga sa dalan, kinsa nasalipdan sa trak nga nag-una namo. Nag-headset pa siya nga nagtindak.
Unta, kay slow moving man siya nga sakyanan, wa siya magpatunga sa karsada, diri ra siya sa daplin. Kay maka-obstruct sa traffic ang hinay nga magdagan nga mga sakyanan taliwa sa huot nga trapiko. Kuyaw pa sa nagsakay ini.
Kon naa gani ta sa karsada, di lang atoang kaugalingon ang huna-hunaon, ang uban usab. Kay kon madasmagan o ikaw ang makadasmag, kalagmitan dunay laing tawo nga na-involve sa imong pagdanghag.
Playground
Duna say ubang bike enthusiasts nga ang karsada gihimo nga playground. Kapila na man ko nakasugat aning mga tig BMX ug ubang tig mountain bike nga anha sa karsada mag-exhibition. Kon di man gani sa dan, anha sa mga sidewalk.
Sa among panahon, ang mga mahilig mag exhibition og BMX moadto man og grounds nga way mga sakyanan. Kon naa man gani sila sa dan, kana sang di daghan ang mag-agian. Gawas pa, lahi ang kaniadto ug karon. Kon maihap ang mga sakyanan kaniadto, karon gatusan ang tubo sa gidaghanon niini matag adlaw.