NING bag-ohay lang, nangayo og ideya ang administrasyong Duterte sa kagamhanan sa Singapore kabahin sa maayo nilang pagdumala sa trapiko. Di ba naghisgot ko giunsa sa Singapore, nga dunay populasyon nga labing minos 5 million, ang maayong pagdumala sa ilang trapiko?
Labing minos 100 percent nga buhis matag sakyanan; magkadako ang makina, magkadako ang rehistrasyon ug buhis; way garahianan, di ka makapanag-iyag sakyanan; ug ang laing gasto kada adlaw mao ang road users fee nga gipaagi sa electronic gadget nga gipamutang sa mga sidewalk.
Ako ning nahisgutan kay ang Singapore mas gamay kon itandi sa Cebu, apan kita dinhi nag-antos sa kahuot sa mga sakyanan gikan sa dakbayan sa Danao ngadto sa Carcar City. Tuod, mas dako ang Cebu itandi sa Singapore, apan ang utok sa atoang mga opisyal sa kagamhanan pwerteng gamaya ug way panglantaw sa umaabot.
Kon tan-awon ang kasaysayan sa Singapore, layo ra kaayo kana sila sa atoang nasod niadtong 1960s. Mahisakop unta sila sa Malaysia kay pulos sila colony sa Britanya, apan wa sila dawata kay gubot pa sa lukot ang mao nga nasod. Apan ubos sa hugot nga pamunoan ni anhing Singaporean Prime Minister Lee Kuan Yew, iyang nabaliktad ang kahimtang sa masakiton nga nasod ngadto sa labing modernong dapit sa Asya ug usa sa mga labing adunahan sa kalibutan.
Ang atoang nasod, gikan sa usa sa labing baskog nga ekonomiya, ngadto sa pagkamasakiton tungod sa kurapsyon ug hakog nga mga pulitiko, inubanan sa way pakabanang mga opisyal sa kagamhanan.
Karsada
Kining kahimtang sa atoang karsada salamin sa di maayong kahimtang sa nasod. Gubot kaayo. Tan-awa ra gud ang atoang kadalanan, gawas nga hagip-ot, ang mga tawo ug sakyanan mag-ilog sa karsada. Kadaghanan way sidewalk ug kon naa man, pwerte ra sang gamaya unya butangan pa og estruktura sa mga namuyo, wa nay kaagian.
Tingali, molampos lang ang kagamhanan sa iyang tinguha sa pagpaluag sa trapiko kon dunay maayong mass transport nga accessible ug masarang ang pletihan bisan sa mga kabos; madasig ang mga tawo sa paglakaw pinaagi sa pagpalapad sa mga sidewalk; ug hawanan kining mao nga mga agianan gikan sa mga nakaali.
Kon kining mao nga mga lakang buhaton sa kagamhanan, hayan makaginahawa og gamay ang atoang kadalanan. Apan makapasagmuyo kay kuwang sa pagpakabana ang kadaghanan. Mao na nga kitang kinabag-an mag-antos.