Overweight

WALA pa gani away, natangtangan na og korona si International Boxing Federation (IBF) junior flyweight champion Johnriel Casimero.

Apan alang sa 24 anyos nga gitawag og Quadro Alas, dili kini ma­kaapekto sa iyang pagpakig-away kang Colombian Mauricio Fuentes (16-2, 10 Kos) sa main event karong gabii sa usa ka boxing promotion sa Waterfront Hotel sa Lahug, Cebu City.

Depensaan unta ni Casimero ang iyang korona ning awaya apan gumikan kay napakyas man siya pagkuha sa 108 lbs. weight limit kagahapon sa official weigh-in sa SM City entertainment center, nahuboan na siyang daan sa iyang bakus bisan modaog pa siya isip usa ka silot.

Kon modaog si Casimero, mahimong bakante ang korona. Kon modaog si Fuentes, iyang mailog ang titulo.

Gipasabot ni Casimero nga wa­la man tuod niya nakuha ang weight limit apan wala kini nagpa­sabot nga dili siya andam alang ning awaya gumikan kay sakto kaayo siya sa preparasyon.

“Nindot ang akong preparasyon pero dili na gyud nako makuha ang timbang. Sa akong hunahuna, kaya pa nako pero dili na makaya sa akong lawas,” matod ni Casimero, kinsa sakop sa Omega boxing stable ug adunay 19-2, 11KOs nga rekord.

Nangayo og pasaylo si Casimero sa mga Pinoy nga nabuhian niya ang iyang korona sa tinimbangay pa lang pero iyang gipasalig nga mobawi siya sa umaabot apan sa mas bug-at na nga timbang.

“Sorry nga napilde na ta’ng daan sa weigh-in. Sorry gyud kaa­yo,” matod pa niya.

Si Casimero mitimbang og 113.5 lbs. samtang si Fuentes nihaom sa 108 weight limit.

Gitagaan og usa ka oras si Casimero aron ma­kapaus-os sa iyang timbang apan nakadesider ang iyang kampo nga dawaton na lang ang silot.

“Amo na mang gibuhat daan ang tanan paro moubos ang iyang timbang pero nidako na gyud ni siya karon,” pasabot sa trainer ni Casimero nga si Pingping Tepura.

Ang promoter ni Casimero nga si Sammy Gelloani misaad nga human ning awaya, lihukon dayon niya aron makaaway pagbalik alang sa world title si Casimero apan sa mas bug-at na nga timbang, flyweight division.

“This is happening in boxing. Mentally kaya pa niya but physically, dili na gyud. Kon i-squeeze nato, i-sauna nato, he will die. So dili na lang nato pugson kay boxing will still be there,” matod ni Gelloani.

Pinaagi sa usa ka interpreter, si Fuentes nagkanayon nga iyang pahimuslan kining maong oportunidad ug iya gyung sakmiton ang titulo.

“Casimero is very weak,” hinubad sa ingles nga asoy ni Fuentes, kinsa adunay 16-2, 10KOs nga rekord.

Sa top supporting fights, ilugan nila ni Harmonito Dela Torre sa General Santos City ug Gadwin Tubigon sa Flores stable sa Mandaue City ang bakanteng WBF super featherweight title ug ilugan sab nila ni Jhack Tepora sa Omega stable ug Joash Aparico sa Bukidnon ang bakanteng WBF Asia Pacific super bantamweight belt.

Sila si Rey Labao sa SGG sta­­ble sa Mandaue City ug Rodel Wenceslao sa Phil-Aust stable sa Mandaue City magsangka alang sa RP lightweight title.