BRISBANE, Australia — Gipakugang ni Australian Jeff Horn ang kalibutan sa boksing human niya nailog ang world title ni Filipino Manny Pacquiao pinaagi sa unanimous decision nga kadaugan kagahapon sa main event sa “Battle of Brisbane” sa Suncorp Stadium.
Nabuhian sa Pambansang Kamao sa Pilipinas ang iyang World Boxing Organization (WBO) welterweight title. Atubangan sa 51,000 ka mga tumatan-aw, si Horn midaog sa scorecards sa tulo ka judges, 117-111, 115-113, 115-113.
Human sa away, mialisngaw dayon ang kabahin sa rematch nga parehong giuyonan sa duha ka mga kampo. “I’m sure he’ll want to come back. It was a close decision and I’m sure he’ll want to come back and prove himself,” matod ni Horn, kinsa misaka sa 17-0-2, 11Kos nga rekord, sa post-fight press conference.
Si Pacquiao, kinsa natagak sa 59-8-2, 38KOs nga baraha, andam sab nga makig-away pagbalik kang Horn hilabi na kay aduna siya’y opsyon nga mangayo og rematch basi sa nakasaad sa kontrata.
Apan alang sa promoter ni Pacquiao nga si Bob Arum, dili makiangayon nga pangutan-on dayon ang fighting senator sa Pilipinas ning puntoha kabahin sa rematch.
“We have a provision for a rematch but it really depends on Manny if he will stay in politics or he will stay in boxing. It is his fiture,” matod ni Arum. “It’s unfair to ask him today about a rematch.”
Nagkanayon ang trainer ni Horn nga si Glenn Rushton nga ang kasingkasing sa iyang batos maoy nagpadaog kanila.
Giangkon ni Rushton nga narugi si Horn dihang naigo kini sa sunodsunod nga kumbinasyon ni Pacquiao sa 9th round.
Ning pagsuwat, si Pacquiao wala pa nakatunga sa post fight press comnference gumikan kay gitahi ang dakong gisi sa tuong bahin sa iyang agtang.
Sa laing bahin, nadepensaan sa Pinoyng si IBF super flyweight champion Jerwin Ancajas (25-1-1, 17KOs) ang iyang titulo pinaagi sa 7th round TKO nga kadaugan batok kang Japanese Teiru Kinoshita (25-2-1, 8KOs).
Usa ka makusog nga tuong kumo ni Ancajas nga miigo sa kilid nga bahin sa tiyan ang nagpaluko ug nagtumba kang Teiru sa ika-1:53 minutos sa 7th round.
Samtang ang laing Pinoy nga nipakita’g aksyon sa promosyon nga si Jonel Dapidran napilde pinaagi sa unanimous decision batok kang Brent Dames.