Myke Obenieta
PUNGKO-PUNGKO

October 19, 2004
Pagkawot sa katol

NIADTONG ang kalibutan lunhaw pa sa atong panan-aw, bu-yagon dayon ta’s kati-guwangan kon motudlo ta’s bangaw. Simbako, kuyaw kuno mabaliko o mabali ang atong tudlo.

Dili na kinahanglang pangutan-on ang pungkol aron ta makasabot unsa kalisud kon wala’y mga tudlo ang atong kamot. Labi na’g hasolon ta sa kalibog, mogimaw dayon ang gilok sa bagul-bagol lakip na sa lubot. Pastilan, pagkanindot gyud ikaw’t. Labi na niining panahon sa pagpangaskas.

Bahin sa mga panghitabo bag-ohay pa lang, dili ikalalis nga laksot ang dagway sa mga namantalà. Gikurikong, gikabahong. Gikawras na sad ug gabili’g lab-as nga samad bisan kon ang panit sa mga panghitabo gibulitan og mga uwat.

Apan, tan-awa, wala gyu’y kahumanan ang pagpangaw’t sa panit. Anaa na pu’y laing katol atul sa pagpanggimaw sa bag-ong labhag sa panlimbawot. Bahin sa balità, ug sumalà pas’ yawit sa mga batà, malatà gyud ang mata sa agtà.

Human niulbo ang aso gikan sa armas niadtong miluthang-patay kang Atty. Arbet Sta. Ana-Yongco, tingali naka-uyon pud kinsa man kadtong nalambigit sa nakaplagang baklag sulod sa usa ka bodega sa Umapad, Mandaue. Kay dili ba lupig pa’y napapha ang baho sa shabu sa atong paghingos sa laing na pung pag-alisngaw sa atong alingasa o kabalaka samtang gadamgo ta’g usa ka katilingban diin hapsay ang atong paghinanok?

Kon ang mga badlongon--tigpayuhot man og shabu o mamumuno man--nga padayong naglawgaw sa atong kalinaw, dili kaha moabot ra ang panahon nga igo na lang ta sa pagpangawot sa atong pahak? Dungan sa pagpangatol sa bagul-bagol sa atong kagamhanan samtang sila nangita’g paagi unsaon paghatag nato’g kahupayan, ang mga balità padayon sa pagbutyag sa lain na pung tudlo nga nagkablit sa mata aron mamikat. Ug tingali igo na lang tang mangutana ug mangawot sa agtang: Unsa na pu’y sunod nga mga mahitabo human sa dugdog, kilat, ug lunop sa mga bati nga mga balità?

Sumala pa, naa kuno’y bangaw nga motumaw inig human sa unos. Apan tinuod pud--ug kini atong maaninaw sa mga laksot natong nasinatian diha sa mga mantalaan nga wala’y undang sa pakurat--nga ang pagpadayon sa katol sa kalimutaw duha ra’y sangputanan. Kon dili motin-aw atong pagtan-aw, mahimong magda’g na lang sa pagkamadudahon ang atong mata ug mangatol kini hangtud piskaton.

Ay, kalisud kon ang atong mata na’y kaloton.

(yomyko@yahoo.com)