|
Thursday, March 27, 2003
Cudiamat: Asino dagiti winners?
By Bagnos Cudiamat
ASINO dagiti mangab-abak iti gubat idiay Middle East? Ti Estados Unidos ken dagiti kaalyadona wenno ti Iraq? Kuna ni Saddam Hussein nga isuna pay laeng ti adda kontrolna iti pagilianna ken iti armadana. Kuna ti coalition forces nga asidegen iti biktoria.
Babaen iti report asidegdan iti Baghdad. Saan nga ammo no asino ti patien. Binomba dagiti eroplano dagiti building iti Iraq. Grabe ti namsaakan dagiti bomba. Kasta met dagiti kanyon dagiti dadakkel a tangke a panggerra ti coalition forces. Adu dagiti natay ken nakautibo iti gubat. Sabali pay dagiti nairaman a sibilian.
Kasta ti gubat. Dagiti sibilian ti kangrunaan nga apektado. Malagipmi ti Maikadua a Gubat iti sangalubongan. Minilion dagiti natay a Hudio iti concentration camps. Ditoy met Pilipinas, adu dagiti Pilipino ti natay idi sinerrek dagiti Hapones ti siudad ti Manila. Sabali laeng dagiti natay kadagiti sabali a lugar. Iti amin a suli ti lubong. Kaaduanna ket sibilian dagiti natay. Sabali laeng dagiti sanikua ti napirdi. Adu dagiti natay gapu iti sakit. Natay iti bisin. Natay gapu iti panagbettak dagiti bomba. Natay iti bala dagiti paltog ken masinggan. Natay babaen iti bayoneta ken panangparigat dagiti kabusor. Iramanmo ditan dagiti babbai nga inaramidda a sex slaves.
Idiay Mindanao, mano a tao dagiti biktima ti gubat? Dagiti pinasabogda a building? Dios a manangaasi.
Umawer dagiti bomba. Dagiti kanyon. Agtudo dagiti bala. Saan met ngarud a pilien dagiti armas a panggubat ti puntaanda. No bumtak dagiti bomba, paglemmengam ngarud?
Ket inton agpukaw ti asuk ti gubat, asino dagiti winners? Uray dagiti kunada a nangabak ket naabakda met latta. Mano a milion a kuarta ti nabusbosda? No mano ti kantidad dagiti bomba a bimtak, bilion a kuarta. Iramanmo ditan dagiti makina a panggerra dagiti napirdi. Eroplano, helicopter ken tangke.
Asino dagiti winners? Pareho a naabakda.
(March 27, 2003 issue)
Want Sun.Star news on your mobile phone? Click here.
Write letter to the editor. Click here.
Join the Sun.Star message board. Click here. |
|
[ return
to top ]
[ home
]
|
LOCAL NEWS
BUSINESS
OPINION
SPORTS
LIFESTYLE
FEATURE
|
