|
Saturday, December 20, 2003
Cudiamat: Dagiti presio
By Bagnos Cudiamat
PROBLEMA ti presio dagiti gagatangen. Dayta sangaribu a pisos nga ipalengkem, agkurang pay. Abusta Paskua manen. Uray no kayatmo ti gumatang para iti pamilia, binnatem la ketdi. Mano ti maysa a kilo ti karne ti manok ken baboy? Uray kayatmo met ti adda pagsasangoan inton noche buena, ay, ket irutam dayta barikes.
Naimbag pay ket idia probinsia ta adda maadas anateng idiay bangkag. Adda makurimes a leddeg, bisukol wenno agurong idiay waig. no adda ramam, adda met kalapen a buntiek, paltat wenno tilapia. No adda mulam a marunggay wenno saluyot, umanay metten a sagpawan iti kuros wenno tinuno a lames.
Ngem no addaka ditoy siudad, gatangem amin. Sangapulo a pisos ti maysa a reppet a tarong. Tallo wenno uppat a bukel a tarong. No paria met, tallo a bukel, agkurang pay a magalgalip. Kasta met to okra. Uray no kayatmo ti agpinapaitan, ay, dipay umanay ti maysa a kilo. Uray no kayat met dagiti annak ti hamon wenno linitson a manok wenno baboy, awan latta. Uray mansanas koma, awan pay igatang. Pagan-anusanen ti bunga ti bayabas. Wenno lukban.
Isu a no dadduma a mapan makipalengke ni baket, agkuraret la ketdi ti mugingna iti kinangina dagiti magagatang. Isu a dataon ti ibaonna a makipalengke.
Ti imasna ta dida met ingato ti sueldo. Uray koma ti 13th wenno 14th month a bunos. Saan payen a makabayad kadagiti utang iti tiendaan. Ay, sangakilometron ti listaan. Dayta pay silaw ken danum. Bagas ken sidaen. Mariakosina.
No mapanka makipalengke, an-anusam lattan ti mangbuya kadagiti nakadispley a makan wenno aruaten. Ay, ket iranada pay nga ipangato ti presio dagiti gagatanegn no Paskua., Ania la ketdi ti biagen. Imbes koma nga ipababada ti presio dagiti kasapulan. Paskua la ngarud.
(December 20, 2003 issue)
Write letter to the editor. Click here.
Join the Sun.Star message board. Click here. |
|
[ return
to top ]
[ home
]
|
LOCAL NEWS
BUSINESS
OPINION
SPORTS
LIFESTYLE
FEATURE
|
