|
Friday, October 10, 2003
Obenieta: Ikid-ikid, tuwad
By Myke U. Obenieta
Pungko pungko
Kon gamhanan ka, din-a kinahanglang mokitiw sa pagsayaw ug ocho-ocho samtang magkinto latay sa alambre. Ug kon buot ka nga mobakli-ad ang mga pobre diha sa imong palad, dili kana lisud buhaton kon duna kay gahum sama sa gihuptan sa presidente. Pwede nimong pa-ikid-ikiron ug patuwad-tuwaron samtang imong paludhon.
Gahapon sa iyang pagbisita sa Sugbo, mora’g ginoo si Presidente Arroyo. Gikataho nga gaprusisyon ang 20 ka Kaoshiung gikan sa City Hall, gahakot sa mga grupo sa mga kabus ngadto sa Cebu City Sports Center aron pagpaniguro nga magpunsisok ang mga maminaw ni Gloria samtang siya makigpulong.
Bisan pa’g pulos baki ang mangambak gikan sa iyang dila, atua gihapon nagduot ang panon, malaumon nga sila maluwas ug mataligsikan og grasya kon sila magpaduol kang Gloria aron manghilam-os sa tu-asik sa iyang layaw nga laway (nga igo gyud nga mopaawas bisan sa lawm nga atabay hangtud manglutaw ug mangaanod ang sagbot sa iyang mga saad ngadto sa mga lapokong kanal-kanal ug imburnal).
Bahala na lang kadtong namikat samtang nag-ampo nga pauwanan og plemahong luwa si Gloria human sa iyang pagsirko-balintong sa iyang panaad kaniadto nga moatras ug din-a modagan sa lumba sa pulitika.
Gahapon, nagpalami si Gloria dihang nanghatag siya og mga titulo sa yuta ug panimalay, ingon man hinabang nga mobalor og P1.3 million lakip na ang 2,000 ka Philhealth cards ug tseke gikan sa Pag-ibig.
Ay, matud pa sa mga naswertehan, nagmilagro gyud si Gloria. Apan kon imong pangutan-on kadtong mga nangyamiid sa iyang pagkalimbongan, tingali sila makapanakla: Pastilan, lupig pang Gloria gipanuwayan.
Apan kon si Ate Glow (ang bayot nga impersonator ni Gloria) ang imong pasultihon, wa’y duda nga siya manguros ug dayon mokapa-kapa samtang manakla: “Ang saya-saya!”
Bisan og anggid-anggid sila ni Nora, tingali buot ni Gloria nga manghimakak sa gipasiatab ni Nora sa iyang salida nga “Himala” diin, isip mananambal nga panganlan og Elsa, iyang gibanghagan ang mga tawo nga gatuo nga siya usa ka milagrosa. “Walang himala,” tyabaw pa niya atubangan sa iyang mga tigpaminaw.
Matud pang Gloria, ang iyang pagdagan sa 2004 gumikan gyud sa pag-tuman sa aghat sa Kahitas-an. Lahi ra gyud kon gamhanan ka sama ni Gloria, hastang Ginoo mohunghong nimo.
Aron ang nasud maluwas sa iyang kalisud, mao kunong si Gloria mopasutoy gyud sa iyang kandidatura. Sa ato pa, bisan daghan ang nangutana kon wala ba siya baliwa, ang iyang hukom sa paglansar pahiuyon diay sa iyang paghigugma.
Kon mao na, ayaw’g kahibulong kon ang theme song ni Gloria ron mao ang “To Love You More” nga gikanta ni Celine Dion.
Ug mao nang kalakiha, aw, wala’y kalainan si Gloria sa bayot nga manambal didto sa lungsod sa Carmen. Si Adelfin, nga kanhi beautician sa Manila ug karon nagpaila nga siya si Tita Brenda, mo-retouch sa iyang eyeliner ug blush-on, unya mopatukar dayon og CD sa kanta nga gipauso og balik ni Sarah Geronimo sa dili pa siya manambal sa mga masakiton.
(October 10, 2003 issue)
Write letter to the editor. Click here.
Join the Sun.Star message board. Click here. |
|
[ return
to top ]
[ home
]
|
LOCAL NEWS
BUSINESS
OPINION
SPORTS
LIFESTYLE
FEATURE
SUPERBALITA
WEEKEND
|
