|
Friday, October 22, 2004
Obenieta: Gikagaw
By Myke U. Obenieta
Unsa’y angayang buhaton aron bisan si Drakula malisang?
Kon ginadili ang pang-limugmog ug pagbugwak og bendita, igo nang ibuhagay sa iyang dagway kining makapabugnaw nga kasayuran gikan sa United Nations. Sumala pa sa ilang nasuta, gi-bana-bana nga anaa’y mga 10,000 ka mga Pilipinong naglaruy-laroy bisan asa sa nasud karon nga anga-yan gyud likayan ni Dra-kula. Panguros, simbako’g apil ka sa mga gitakbuyan nianang gitawag nga HIV (Human Immunodeficiency Virus). Ganahan pa kaha si Drakula--o dili ba kaha lud-on--nga ang ilang dugo supsopon?
Kuyaw bitaw, apan dili kaha kanang 10,000 nga mga gi-kagaw ang dugo tipik ug taphaw lang sa tinuod gyud nga gidaghanon? Kon mao nang kalakika, mahimong daghan pa gyud ang mga gipangtakdan. Ay, pastilan kon lakip na pud ang mga baboy sa mga gikagaw og HIV. Gibahak na, daghan ra ba nato kinahaham kaayo ang sud-ang dinugoan.
Apan dili lang baya ang paglipang sa kagaw gikan sa HIV mao ra’y makapatikbi sa atong atay. Ug kon kuwayan tang Drakula, labing makapakurog sa atong kaunoran ug makapabalit-ad sa atong tinae ang wala’y undang nga pagkadugta sa atong pagtuo nga mapukan ra gyud--puhon, ugma damlag--ang mga nagsupsop sa dugo sa atong nasud: mga badlongon, mga limbongan, mga salawayon.
Bahin aning mga tawhana, tinuod dili na init ug pan-os na ang mga nabaniog nga mga kyawkyaw batok sa nagkalandrakas nga mga kagaw sa ilang hinanggaw. Apan bisan naanad na kita nga wala gyu’y aso nga makumkom, mobukal gihapon atong dugo mata’g ulbo sa ulahing mga kontrobersya, eskandalo, anomalya.
Tingali, mentras padayong gadagayday ang dugo sa atong kaugatan, dili gyud moundang ang pag-awas-awas sa mga lab-as ug langto nga mga balita.
Labi na nang bahin sa mga mga dagkong tawo nga nakapagamay sa atong pagsalig sa pangagamhanan. Lupig pa nato’y mga iro nga gahabhab og pan-os nga bahaw binahugan og dinugoan! Ug dayon, mo-aw-aw ug mouwang dayon sa gatakdol nga buwan.
Panghupaw, panghuy-ab, panghuyatid. Tinuod, puol na kaayo ang atong mga nabatian bahin sa pagkaluspad niining mga pulong sa inengles-- “decency, honor, integrity.” Tinuod, gamay ra kaayo nang 10,000 sa mga Pilipino--uyamot o dagkong tawo man--kansang dugo wala naduhigan og nana sa pamintaha. Kinsa’y molalis nga kanang mga heneral, mga huwes, mga opisyal nga gipangsuspenso tipik lamang sa usa ka dakong dangan nga gakutkot sa unod sa atong tingusbawan?
Samtang nagpadayon ang pangurakot ug lain pang pa-kurat, dili na kinahanglan ang paglipang sa HIV o ang paghamok ni Drakula aron motingkagol atong dugo sa tumang kalisang.
(yomyko@yahoo.com)
(October 22, 2004 issue)
Write letter to the editor.Click here.
Join the Sun.Star message board.Click here. |
|
[return to top]
[home]
[network page]
|
LOCAL NEWS
BUSINESS
OPINION
SPORTS
LIFESTYLE
FEATURE
SUPERBALITA
WEEKEND
|
