|
Friday, January 28, 2005
Obenieta: Aso ug anino
By Myke U. Obenieta
Pungko pungko
Kon dili pahak ang imong pagsalig, dili gyud ka mangutkot sa imong ulo kon mag-estorya ta bahin og pagtuo. Ug dali ra dawaton nga mahitabo ra gyud, pananglitan, ang pagkabanhaw gikan sa lubnganan. Mora’g milagro. Dili halayo sa mga panghitabong kahibulongan diha sa puting tabil.
Dinhi sa Sugbu, namitoon ang mga mata niadtong naghuwat og katumanan sa usa ka tinguha nga giaaninohan sa usa ka pangutana: Mosidlak pa ba kaha pagbalik ang adlaw sa salidang Bisdak?
Dili ba kini sama ra sa pagpangidhat sa kangitngit o pabudlat sa udtong tutok? Damgo o daman?
Sa pagkapupos karong adlawa sa “Sine Ug Katilingban 2005,” gipahigayon diha sa SM City Cebu atul sa pagsaulog sa National Arts Month, padayong gidagkotan ang mga kandila nga dili unta malubong sa kalimot ang mga kasinatian nga lunlon, mga salidang inato ra gyud ang makapasundayag.
Kon mag-agad ta sa mainitong pakpak nga gibugti sa mga mitan-aw og “Panaghoy sa Suba” sa niaging gabii, mora ta’g hilantan sa himaya. Labi na gyud kon atong tan-awon nga ubay-ubay pud dia’y ang nagdamgo. Anaa, pananglitan, ang Cebu Filmmakers Society ug ang Revive Cebuano Film Movement (nga gilangkoban sa SineBuano, Tagulilong, UPelikula, STCine, SWU Cycle Studios, USJR Masscom Coordinates, USC TV Arts).
Tingali, gumikan kay mas dali na ang pagbuhat og pelikula labi na karon nga misulbong na ang “digital technology,” ang paglihok sa sugilanon diha sa puting tabil, aron matuman ug atong makit-an, dili na kaayo nagkinahangla’g dako nga puhonan. Labi na karon nga nagkanihit ang mga tumatan-aw og sine karon nga nauso na ang mga CD ug DVD nga mapalgan diha sa kilid-kilid sa kadalanan.
Duyog niining pagdilaab sa katakus aron magmugna’g salidang Bisdak, nga giduslitan sa abrakadabra sa teknolohiya, tingali kinahanglang hinumdoman nga wala kini magpasabot nga moabot na gyud ang “happy ending.”
Gani, nagkalisud hinoon ang tahas nga nahisang-at sa abaga sa atong mga tigmugna’g salida karon. Likay sa mga pan-os nga pananglitan sa mga kasinatiang Bisdak nga gitagana sa mga salidang inato (sama sa “Ang Manok ni San Pedro” ug “Matud Nila”), kuyaw kaayo ang hagit sa pagpangita’g lunhaw nga mga punto de bista ug pamaagi sa paghubit niini nga nagsalamin sa kinabuhing Bisdak.taliwala sa mabulokon apan makalibat nga kalibutan karon. Ay, sa pagkatinuod lang, habog ug lapad ra ba kaayo ang kal-ang taliwala sa pagdamgo ug pagmugna.
Kon molayat ug molupad ba gyud ang pagtuo sa buot maghimo’g salidang Bisdak, kana atong huwaton puhon. Bitaw, tan-awon ta lang.
(yomyko@yahoo.com)
(January 28, 2005 issue)
Write letter to the editor.Click here.
Join the Sun.Star message board.Click here. |
|
[return to top]
[home]
[network page]
|
LOCAL NEWS
BUSINESS
OPINION
SPORTS
LIFESTYLE
FEATURE
SUPERBALITA
WEEKEND
|
