|
Friday, June 10, 2005
Obenieta: Hapak sa agtang, lunit sa dunggan
By Myke U. Obenieta
Pungko pungko
Bulahan ang mga buogon kay bungol sa kabanha sa nasud karon.
Samtang wala’y pu-as ang pagbuto sa mga balita kabahin sa jueteng ug uban pang pasangil punting sa Malacañang, tingali ang pamuno sa nasud nangindahay nga nabulit og atuli o dili ba nagtabisay og buog ang dunggan sa kinabag-an. Ug tingali dili na ta manginlabot kon tinuod o bakak ba ang gisulti ni Presidente Arroyo sa iyang campaign adviser sulod sa kontrobersiyal nga tape recorder nga gibaniog karon sa iyang mga kaatbang sa politika.
Ug samtang gaulbo ang kaspa ni Ar-royo samtang nanguktkot og kahupayan niining bag-ong labad sa iyang ulo, wala siya’y kalainan sa usa ka estudyante nga gikulbaan kon mahagbong o makapasar ba kaha niining ulahing pagsuway.
Kinsa’y sakto? Kinsa’y sayop? Butikaw, butikaw…
Ay, kon kini mao’y himoong pangutana ngadto sa mga estudyante, tingali’g mosamot sila kalibog taliwala sa politikanhong alingugngog.
Ug kuyaw pud matabunan ug mahilom ang lain pang kutay sa mga pangutana nga hugot naghigot sa liog sa nasud.
Matud pa sa nasudnong awit, kining “yutang tabunon” usa ka “mutya nga masilakon” nga duna’y “putling bahandi.” Kon kini tinuod ba o dili, usa kini ka pamahayag nga lutaw sa laway apan layaw sa paminaw.
Mutya nga masilakon ba dia’y ang nakita sa atong mga magtutudlo samtang ang kangitngit mihugpa sa kinabag-ang mga tunghaan? Duna ba’y putling bahandi nga maaninaw samtang mikisaw ang lukot sa laing nagkagubot nga mga pangutana:
Unsaon pagsugpo sa mga naandang suliran sama sa kakuwang sa mga magtutudlo, kahimanan, ug mga lawak samtang nagkadaghan ang mga bata nga gipaninguha sa ilang mga ginikanan nga dili magdako nga wala’y kabangkaagan?
Kanus-a man motaas ang ang-ang sa kahibalo ug kaalam sa mga magtutudlo nga nagsagubang sa suholan nga ubos kaayo sama sa nagkakunhod nga pagtahud alang sa ilang propesyon?
Unsa’y buhaton sa pangagamhanan isip pagsanong sa bag-ong nahibal-an sa Department of Health (DOH) nga mingdaghan kuno ang mga bata sa Pilipinas nga hinay og pangisip gumikan sa malnutrisyon? (Sumala pa sa DOH, labaw sa upat ka milyong bata nga may edad lima pataas ang kuwang og sustansiyadong pagkaon. Kada tuig, hapit nga 300,000 ka mga batang masuso ang gipanganak nga duna’y "intellectual impairment." Naa kuno’y siyam ka milyong mga bata ang luspad ug luya “mental development.”)
Apan bisan pa man niini, pastilan, padayon gihapon ang buroka sa mga politiko. Ug tingali tungod kini kay kuwang og dukol ang ilang mga utok nga nagtingkagol. Tingali’g wala pud nila madunggi ang alingisig sa nagkadaiyang mga pangutana tungod kay ang ilang pangisip ug pagbati sama ra pud ka espiso sa buog sa kinabugoan nga bata sa klase.
(yomyko@yahoo.com)
(June 10, 2005 issue)
Write letter to the editor.Click here.
Join the Sun.Star message board.Click here. |
|
[return to top]
[home]
[network page]
|
LOCAL NEWS
BUSINESS
OPINION
SPORTS
LIFESTYLE
FEATURE
SUPERBALITA
WEEKEND
|
