|
Wednesday, August 24, 2005
Barrita: Nahadlok?
By Eddie O. Barrita
Gibabagan sa mga kongresista nga naglaraw sa pagbuakbuak sa Sugbo ngadto sa Cebu del Norte, Cebu del Sur ug Cebu Occidental ang paghimog public hearing sa ilang mga balaudnon dinhi sa Sugbo.
Unsa, nahadlok silang mahibaw-an unsay tinuod nga sentimento sa mga Sugbuanon bahin sa Sugbuak?
***
Nag-andam si Cebu Archbishop Ricardo Cardinal Vidal og mas matulon-anon ug mas isog nga pastoral letter batok sa Sugbuak.
Kini aron makapangandam ang katawhan kon dunay plebisito alang sa laraw nga buakbuakon ang lalawigan sa Sugbo. Gitawag sa talahurong cardinal nga evil ang Sugbuak.
Wa kaha ni magkinahanglan og exorcism?
***
Makaapil ba ang mga lumolupyo sa dakbayan sa Sugbo sa maong plebisito?
Ang dakbayan sa Sugbo, isip usa ka highly urbanized city, di na makaapil sa pagpili og mga opisyal sa lalawigan sa Sugbo. Ang kagamhanan sa probinsya di na sab ma-kapanghilabot sa kalihukan sa dakbayan sa Sugbo. Nalutas na ang dakbayan gikan sa lalawigan sa Sugbo.
Apan matod pa ni Cebu City Mayor Tomas Osmeña, kinahanglan nga mahilakip ang taga siyudad kay dako kaayog epekto sa atong ekonomiya ug kultura ang pagbuakbuak sa Sugbo.
***
Ang Sugbo nahimo na karon nga Island of Festivals. Tan-awa, ang dakbayan sa Talisay dunay Inasal Festival, ang lungsod sa Cordova dunay Bakasi Festival, and dakbayan sa Mandaue dunay Mantawi Festival, and dakbayan sa Lapu-Lapu dunay Kadaugan sa Mactan, ang lungsod sa Daanbantayan dunay Haladaya.
Nag-una niini ang Sinulog Festival dinhi sa dakbayan sa Sugbo.
Kon madayon ang Sugbuak, duna na sab unya tay Sugbuak Festival.
(Sun.Star Superbalita [Cebu]
(August 24, 2005 issue)
Write letter to the editor. Click here.
Join the Sun.Star message board. Click here. |
|
[return to top]
[home]
[network page]
|
LOCAL NEWS
BUSINESS
OPINION
SPORTS
LIFESTYLE
FEATURE
SUPERBALITA
WEEKEND
|
