|
Friday, September 02, 2005
Obenieta: Ay, kalisud!
By Myke U. Obenieta
Pungko Pungko
Kon linawgaw ang hisgutan, dili ikalilong nga kitang mga Pinoy dili gyud maulahi. Bahin sa mga hinanggaw, daghan kaayo ta’g nakat-onan. Gani, naa’y daghang mga pasiaw diin ang Pinoy dili gyud malupigan sa iyang pakigtigi batok sa mga langyaw.
Apan, taliwala sa mga nagkadaiyang kagubot ngadto-ngari, dili malalis ang mga langyaw kon sila makaingon nga kita usa ka nasud sa mga batang wala’y buot.
(Ug kini dili lang tungod kay kadag-hanan sa atong mga magtutudlo mga pulpol---sumala pa sa nahibal-an ni Mayor Tom Osmeña dinhi sa Sugbu diin nihit kaayo ang nakapasar aron mohulip sa kakuwang sa mga magtutudlo.
Tingali, tinuod pud kini sa ubang mga dapit sa nasud.)
Nan, sarang nang makakutaw sa utok-bolinaw ang gilawmon ning usa ka pangutana: Unsaon man nato aron mahaw-as ang nasud gikan sa iyang pagkalumos sa kasamok ug kalisud?
Apan di kuno angayang kutkoton ang kabahong sa bagul-bagol kon atong hisgutan ang nasudnong kalambuan (usa ka butang nga nataligam-an didto sa Kongreso diin ang mga maantigo hanas kaayo sa pagpataas sa ilang ihi.) Sigon pa sa usa ka nailhan nga Alexander Ledesma Lacson, bisan ang wala makataak og tunghaan dako pa’g mabuhat kon itandi sa mga magbabalaud kon tumanon ang iyang gilatid diha sa usa ka gamayng’ basahon nga gipakatag karon sa Metro Manila.
"Twelve Little Things Every Filipino Can Do To Help Our Country," mao kini ang ulohan sa booklet ni Lacson. Pastilan, hayahay unta kon ang iyang gituohan nga sayon buhaton dili lisud tumanon. “Very concrete, practical and doable,” matud pa sa usa ka pari bahin sa mga sugyot ni Lacson:
1. Sunda ang lagda sa trapiko
2. Kon duna ka’y gipalit kun gibayran, kanunay pangayo’g resibo.
3. Ayaw pagpalit og mga “smuggled goods.” Palit og inato.
4. Kon makighinabi ka sa uban, labi na sa mga langyaw, isugilon ang nindot bahin sa atong kaliwat ug nasud.
5. Tahora ang nagdumala sa trapiko, ingon man ang kapulisan, sundalo, ug uban pang nangalagad sa publiko
6. Ayaw pagpataka og labay sa basura. “Segregate. Recycle. Conserve.”
7. Buligi ang imong simbahan.
8. Panahon sa piniliay, buhata ang imong balaanong tulomanon.
9. Bayri og sakto ang imong mga empleyado.
10. Bayri ang imong buhis.
11. Pagsagop og “scholar” kun pagsagop og usa ka batang uyamot
12. Pagtarong sa imong pagkaginikanan.
Bitaw, ang napulo’g duha ka mga bulohaton yano kaayong paminawon. Apan sama sa Napulo Ka Sugo, labing sayon ang pagpatuman sa kasubo.
(yomyko@yahoo.com)
(September 2, 2005 issue)
Write letter to the editor. Click here.
Join the Sun.Star message board. Click here.
|
|
[return to top]
[home]
[network page]
|
LOCAL NEWS
BUSINESS
OPINION
SPORTS
LIFESTYLE
FEATURE
SUPERBALITA
WEEKEND
|
