Saturday, November 05, 2005
Barrita: RVAT
By Eddie O. Barrita
Nilig-on ang peso batok sa dolyar tungod sa pagpahamtang sa Reformed Value-Added Tax (RVAT).
Apan tungod sa RVAT, nisaka sab ang presyo sa nanag-unang mga palaliton, lakip na sa gasolina, krudo, elektrisidad ug pletihan.
Unsa pa kahay atong mapalit sa nilig-on nga peso nga suweldo na man lang maoy wa mosaka?
***
Nihulga ang Cebu City Hall nga rebukahon ang business permits sa mga negusyanteng magpalabig umento sa presyo sa mga palaliton. Maayo untang magbutang ang City Hall og price ceiling sa nanag-unang mga palaliton.
Ang pait, kon moreklamo ka nga ang baligya labaw sa price ceiling, ingnon lang kas tindera nga didto ka palit sa City Hall.
***
Ang RVAT usa ka consumption tax kay ang mga konsumidor maoy magbaguod sa pagbayad niini. Ang manufacturers, producers ug sellers igo lang mohapak sa buhis ngadto sa pumapalit. Mas dako kag konsumo, mas dako kag mabayrang buhis.
Matod pa ni Supreme Court Associate Justice Dante O. Tinga sa iyang dissenting opinion sa kaso sa RVAT, under the new (RVAT) law, there is precisely a legislative recognition that it is the end-user, not the seller, who shoulders the RVAT.
***
Sa pagsaka sa presyo sa gasolina, nakapabor kadtong nag-drive og mga taxi units nga naggamit og liquefied petroleum gas (LPG). Apan 500 lang sa 5,000 ka mga taxi unit sa Sugbo ang naggamit og LPG.
Ang litro sa gasolina mokahit-kahit na sa P40 samtang P24 lang ang kilo sa LPG. Labing minos P30,000 ang gastuhon sa operator aron i-convert ang makina gikan sa gasolina ngadto sa LPG.
Pero, kon i-convert ang tanang taxi units ngadto sa LPG, dunay kasegurohan nga di umentohan ang presyo sa LPG?
(Sun.Star Superbalita [Cebu]
(November 5, 2005 issue)
Write letter to the editor. Click here.
Join the Sun.Star message board. Click here. |
