|
Saturday, November 12, 2005
Barrita: Murder City
By Eddie O. Barrita
Naila si Konsehal Procopio Fernandez sa dakbayan sa Sugbo sa iyang pagkakalma. Apan sa session sa konseho niadtong Miyerkules, nangugat nga nagwarawara si Konsehal Fernandez sa kopya sa Sun.Star Cebu diin nagbansiwag ang headline nga nagbunyag sa dakbayan sa Sugbo nga usa ka “Murder City.”
Nabalaka siya nga kon di masulbad sa kapulisan ang 102 ka mga kaso sa pagpatay sa mga vigilantes, motapot ang ngan nga “Murder City.”
Di ni dayon maundang, konsehal. Kay matod pa ni “Sayaw,” ang niangkon nga tigpamaba sa mga vigilantes nga nitawag sa Sun.Star Superbalita, duna pay laing 50 ka mga kriminal nga ilang tumbahon.
Ang kuyaw nga moabot ang panahon nga maghimo tag “Vigilante Festival” sa “Murder City.”
***
Wa magpasagad ang kapulisan sa ilang trabaho, matod pa ni Acting Cebu City Police Director Melvin Gayotin.
Ang nakadaot, matod niya, kay wa silay mga witness, way mga complainant batok sa mga vigilantes.
Mao na nga ang ika-102 nga gitumba sa mga vigilantes diha na gyud sa baba sa headquarters sa Mobile Patrol Group.
Wa na say mga witness ug complainant?
***
Si Akbayan partylist Rep. Loreta Ann “Etta” Rosales molusad og congressional inquiry sa vigilante killings dinhi sa dakbayan sa Sugbo. Mohimo sab siyag privilege speech bahin ning giingon niyang teribleng pagpatay sa mga kriminal.
Tan-awon nato kon ang di masulbad sa kapulisan masulbad ba sa congressional inquiry ug privilege speech.
***
Dunay 21,204 ka mga pulis, balig 19 porsyento sa 120,000 ka mga pulis sa nasod nga way service firearms.
Sa sunod, kinahanglan nga kadto lang mga aplikante nga dunay kaugalingong pusil maoy dawaton sa pagkapulis.
--Sun.Star Superbalita [Cebu]
(November 12, 2005 issue)
Write letter to the editor. Click here.
Join the Sun.Star message board. Click here. |
|
[return to top]
[home]
[network page]
|
LOCAL NEWS
BUSINESS
OPINION
SPORTS
LIFESTYLE
FEATURE
SUPERBALITA
WEEKEND
|
