|
Wednesday, November 23, 2005
Barrita: Tulay o tunnel?
By Eddie O. Barrita
Supak ang pipila ka mga opisyal sa Sugbo sa sugyot sa Mactan-Cebu Bridge Management Board sa pagtukod sa ikatulong taytayan nga magdugtong sa mga isla sa Sugbo ug Mactan kay di maoy kasulbaran sa kahuot sa trapiko sa duha ka tulay.
Gawas nga mahal, nagkinahanglan kinig taas nga vertical clearance aron makaagi ang mga dagkong foreign vessel paingon sa pantalan sa dakbayan sa Sugbo.
Unsa man, balik na lang tas sakayan nga linayagan o hinayhinay tag bugsay paingon sa Opon?
***
Nisugyot sila si Mandaue City Mayor Thadeo Ouano ug Rep. Eduardo Gullas nga usa ka tunnel maoy himuong ikatulong koneksyon sa mga isla sa Sugbo ug Mactan.
Si Cebu City Mayor Tomas Osmeña nisugyot nga mas barato kon ferry na lang. Pero matod pang Mayor Ouano, mas maayo ang tunnel kay mahimo pa ni nga tourist attraction.
Ang pangutana kon asa dapit ibutang ang tunnel. Kay mahisama unya ni sa Cebu South Coastal Road nga masayonsayon lang sa pagpasira. Di ba, Congressman Gullas, Sir?
***
Atol sa bag-ong natapos nga Ad Congress dinhi sa dakbayan sa Sugbo nga gitambungan sa mokabat sa 2,700 ka mga delegado, gituki ni Jaime Augusto Zobel de Ayala, presidente sa Ayala Corp., ang kamahinungdanon sa pagkat-on sa pinulongang Iningles.
Gikinahanglan kini ilabi na sa gipangtukod dinhi nga mga call center nga naproblema sa pagpangitag mga kawani kay sa usa ka gatos nga aplikante, maayo na lang og dunay lima nga madawat kay mao ray maayong mo-Iningles. Mao na nga bisan nagmahal kita sa Bisaya nga maoy pinulongan nga atong namat-an og kahayag, angay usab kitang magtuon og Iningles.
Apan angay unahon ang mga magtutudlo mismo. Unsaon pagkat-on sa mga tinun-an og Iningles kon hastang maestra moingon, You’re very grave class, even pencil you have no?
—Sun.Star Superbalita [Cebu]
(November 23, 2005 issue)
Write letter to the editor. Click here.
Join the Sun.Star message board. Click here. |
|
[return to top]
[home]
[network page]
|
LOCAL NEWS
BUSINESS
OPINION
SPORTS
LIFESTYLE
FEATURE
SUPERBALITA
WEEKEND
|
