|
Saturday, April 29, 2006
Barrita: Tuba ug CPR
By Eddie O. Barrita
Ang tuba maayong iparis sa kinilawng isda. Apan matod pa ni Vice Gov. Gregorio Sanchez, epektibo sab diay ni isip fire extinguisher labi na kon ang sunog mahitabo sa halayong dapit nga way mga bombero.
Unsay ikasulti sa mga palainom og tuba?
Di kaha sila moingon, bahalag mangaugdaw mo diha, ayaw intawon ninyog hilabti ang among tuba?
***
Kon tinuod ning giingon ni Vice Gov. Sanchez, daghan na unyang kabalayan sa kabukiran nga mangandam og tuba. Modaghan sab ang mga manananggot kay daghan nang mopalit og tuba.
Di kay nangandoy kang masunog imong balay, pangandam lang simbako layo ra kadto.
Total, kon way sunog, ang tuba mahimo mang bahal ug ngadto na sa suka. Ug ang suka gikan sa tuba maoy laming itimpla sa kinilawng isda.
***
Timing ning pagtuon mahitungod sa tuba nga gipasiugdahan ni Vice Gov. Sanchez.
Tan-awa kadtong sunog nga nahitabo sa lungsod sa Pinamungajan. Duna untay trak sa bombero ang lungsod pero way bombero. Way yawe sa trak ug way tubig kay gibisibis sa mga tanom isip pangandam sa ilang pista karong Mayo 3-4.
Kon duna pa lang unta silay pundong daghang tuba.
***
Apan di tingali maayo nga tuba maoy ikarga sa mga trak sa bombero. Gawas nga dako kining gasto sa kagamhanan, kon way sunog, maproblema intawon ang mga bombero sa pagpangitag sumsuman.
Delikado sab kon ang trak sa bombero nga puno sa tuba maoy magamit pagpasirit sa mga raliyesta.
Unsa kahay dagway no ni kanhi vice president Teofisto Guingona ug sa ubang mga lider sa oposisyon kon makaligo silag tuba?
Kuyaw sab kon makahibawo ang mga raliyesta nga tuba ang ipasirit. Di kaha sila magbawon og sumsuman?
--Sun.Star Superbalita [Cebu]
For Bisaya stories from Cebu. Click here. (April 29, 2006 issue)
Write letter to the editor.Click here.
Join the Sun.Star message board.Click here. |
|
[return to top]
[home]
[network page]
|
LOCAL NEWS
BUSINESS
OPINION
SPORTS
LIFESTYLE
FEATURE
SUPERBALITA
WEEKEND
|
