|
Wednesday, June 21, 2006
Malilong: ‘Naa sa kasingkasing, wa sa dila’
By Frank Malilong Jr.
The Other Side
Wa koy hunahuna nga makig-indig nila ni Eddie Barrita ug Bobby Nalzaro, kang kansang kahanas sa pagsulat sa Binisaya mahimo tingaling hitupngan apan dili gyod malabwan. Nadani lang ko nga magbinisaya karong adlawa kay nakadawat man gud ko og usa ka sulat gikan sa usa sa akong diyotay ra kaayong mga magbabasa nga niingon nga wa kuno koy pagmahal sa akong yutang natawhan kay pirmi nakong gibugal-bugalan kadtong mga tawo nga dili makama-o mo-Iningles.
Unya, nakadawat pa gyod ko ug suwat gikan ni kanhi konsehal sa Sugbo, George Baladjay, nga lawom kaayo ang Binisaya, hapit ko malumos ug hinubad. Pastilan, nakahinumdum lang hinuon ko niadtong silingan ni Ronnie Catipay sa Malabuyoc nga giingnan sad nga way pagmahal sa iyang kaugilong yuta kay nagsigi lang ug langyaw.
“Unsaon nako pagmahal sa akong yuta,” tubag sa silingan ni Ronnie, “nga bisan gani ang kalamunggay dili man mabuhi didto.”
Wa tawon ko magbugalbugal sa mga dili makahibalo mosulti og Iningles uy.
Gahapon bitaw, samtang gi-inspeksyon ang akong sakyanan sa mga guwardya sa SM, nawagtang ang akong sapot ug kagutom dihang akong nadunggan ang usa sa mga guwardiya nga nikanta, “O my lab, am hunger por your tats.” Padaplin mo, Righteous Brothers.
Ang pagmahal sa yutang natawhan naa sa kasingkasing, wa sa dila. Mao nay gisulti ni Max Soliven: “Patriotism is in the heart, not in the tongue.”
Ang ako lang mao nga nakabentaha man unta ta sa ubang mga nasod tungod sa atong kahanas sa Iningles, ngano man nga ato man kining biyaan aron lang ingnon nga nagmahal ta sa atong nasod? Kadaghan man diha nga maayo mo-Tinagalog (ayaw ko ilara, ‘Tits, di tawon na Pilipino), apan unsa man, tinuoray ba gyod ang ilang pagmahal sa lungsod? Kana bitaw nga nagsigi og lalis nga usabon ang atong Batakang Balaod, di ba mga Tagalog na sila?
Unya, unsay may ilang nahimo aron pagmatuod nga patriotic sila? Ang kataposan nakong nabasahan mao nga ang Tugon ng Bayan (Tagalog nang tugona, dili Binisaya) gusto nga ipa-abolish ang Lower House aron ang Senado na lang ang mahibilin. Klaro nga kini agi og bawos sa sigi nga tawirwir sa Sigaw ng Bayan nga tangtangon ang Senado.
Kon akoy pangutan-on, di kaha maayo nga ato silang huroton pagtangtang? Way Kongreso, way husgado ug way Malacañang. Ato na lang nga ipapakyaw sa mga pribadong kompaniya ang pagpadagan sa gobyerno. Menos pa sa gasto, basig mas maayo pa ang serbisyo nga atong madawat.
Apan aduna koy estudyante nga mas brilliant ang idea. Ingon niya nga maayo tingaling papason na lang ang tanang mga balaod ug ang ipatuman mao ang balaod sa manok. Dili na lang ko mosulti kon unsa nang balaora. Tan-awa lang ninyo kon unsay buhaton sa sunoy kon makakita ug himungaan sa unahan.
(fmmalilong@yahoo.com)
For Bisaya stories from Cebu. Click here. (June 21, 2006 issue)
Write letter to the editor.Click here.
Join the Sun.Star message board.Click here. |
|
[return to top]
[home]
[network page]
|
LOCAL NEWS
BUSINESS
OPINION
SPORTS
LIFESTYLE
FEATURE
SUPERBALITA
WEEKEND
|
