Sunday, September 24, 2006 Barrita: Tubig By Eddie O. Barrita
Ingon sa matinuod gyud ang ilang panagna nga tubig maoy sinugdan sa sunod nga gubat.
Sama sa P1.8 bilyunes nga Carmen Bulk Water Supply Project.
Hayan nga mahimo ning sinugdan sa gubat tali nila ni Cebu City Mayor Tomas Osmeña ug Mandaue City Mayor Thadeo Ouano.
***
“We don’t care who gets to supply the water. What we care about is our water,” matod pa ni Mayor Ouano.
Ang wa niya mauyoni nga dunay “unauthorized” nga mosulti ug mobarog alang sa Metro Cebu.
Ingon pa ni Mayor Teddy: “Kinsa man diay magbuot? Amo man ning tubig.”
Way ilugay.
***
Gisupak ni Mayor Osmeña ang Carmen Bulk Water Project kay taas ang presyo sa tubig.
Kon dunay challenger niini unya maoy modaog sa bidding, pabayron pag P200 milyunes nga development cost ngadto sa project proponent.
Apan di na siya motuki sa maong proyekto kon si Mayor Ouano maoy pabayron sa P200 milyunes.
Kuyaw sab kon kutob ras Mandaue ang water supply.
***
Giindosar ang maong water supply project sa mga opisyales sa amihanang bahin sa Metro Cebu.
Apan inay signature campaign, mas maayo pang ipasabot sa project proponent ang ilang gipangayong P200 milyunes nga project development cost refund, matod pa ni Capitol consultant John Pablo Garcia.
“This issue is bigger than politics. It is bigger than the Tomas vs. Teddy issue,” matod pang Garcia.
Dako mo lang.
Labi na gyud kon wa nay tubig nga moagas sa atong mga gripo.
