Saturday, November 25, 2006 Barrita: Saved by the summit By Eddie O. Barrita Tikdul-tikdol
Di pa papahawaon ni Cebu Gov. Gwendolyn Garcia ang 20,000 ka mga lomulupyo sa Barangay Lahug, dakbayan sa Sugbo hangtod sa pagkatapos ning tuiga. “I assure we will not move until next year,” matod pa niya kay una niyang giatiman ang pagpangandam sa 12th Asean Summit. Saved by the summit.
*** Gisud-ong ni Gov. Garcia ang “humanitarian aspect” sa kahimtang sa nanagpuyo sa mga luna nga gipanag-iya sa lalawigan sa Sugbo kay nagsingabot na ang Pasko. Di kaha mag-ambahan ang taga Lahug pinangulohan ni Barangay Captain Mary Ann delos Santos aron manaygon sa Kapitolyo?
*** Gipapili ni Cebu City Mayor Tomas Osmeña ang taga Lahug: Asa mo, sa inyong barangay captain o sa inyong mayor? Maayo gani kay wa mobawos og pangutana ang taga Lahug, Kinsay gibaraw sa konseho?
*** Butangan ang South Road Properties (SRP) og 45-foot-tall signage nga mobalor og P8.2 milyunes ug gihulagway nga susama sa Hollywood sign. Syarog di pa gyud mahalin ang P6.3 bilyunes nga SRP ani.
*** Nisanong ang National Organizing Committee sa 12th Asean Summit sa yangungo sa mga exporter ug mga banker nga hatagan silag exemption sa four-day holiday. Ingon pas taga Cabadiangan, nakasabot silang di mohunong pagtuyok ang kalibotan tungod lang sa summit.
*** Usa ka pari gikatahong nanghinol sa mga babayeng tinun-an sa Abellana National High School samtang nangumpisal sila. Tingali usa kadto siya sa nituo sa tambag nga di gyud magpatintal sa babaye samtang diha pas seminaryo. Total, dugang pa sa maong tambag, asa ra man nang babaye kon mapari ka na.
*** Sa boto nga 8-7, gilubong na sa hingpit sa Korte Suprema ang people’s initiative (PI) nga gitawag nilang grand deception ug gigantic fraud alang sa Charter Change (cha-cha). Ang wa mahimo sa PI, buhaton sa constituent assembly (Con-As). Bag-o nang atong Constitution sa di pa moabot ang Pasko, matod pang Speaker Jose de Venecia Jr.
*** Sa samang higayon, gibanhaw sa Korte Suprema ang Republic Act 6735, ang Initiative and Referendum Act. Ang di mahimo kaniadto, mahimo na karon.
*** Matod pa ni kanhi Cebu Gov. Pablo Garcia, ang constitutional convention mao gihapon ang labing maayong paagi sa pag-usab sa atong Batakang Balaod. Galing lang, dunay nagdali-dali kay napupos na ang ilang constitutional term limits.
