Saturday, December 23, 2006 Barrita: Caring, sharing By Eddie O. Barrita Tikdul-tikdol
GIAWHAG ni Cebu Archbishop Ricardo Cardinal Vidal ang katawhan sa pagbaton sa mga mithi sa caring and sharing.
Pero di ko motuong mao kini ang hinungdan nga wa na siya kahibawo kon hain na kadtong pari nga gireklamong nanghinol sa mga babayeng tinun-an sa Abellana National School.
Matod ni Cardinal Vidal, angayan sab natong isalikway ang atong pagkamaduhaduhaon.
Skepticism and indifference have held us in changing for the better, niya pa.
Ug mao kini ang hinungdan nga pipila lang ka libo ang nitambong sa prayer rally didto sa kaulohan niadtong niadtong Dominggo.
***
Ang sharing and caring mao usab ang tema sa umaabot nga 12th Asean summit.
Apan nganong daghan gihapong di motuo sa pasalig ni Ambassador Marciano Paynor Jr. nga “500 percent definite” nga madayon ang Asean summit karong Enero?
Di man matag-an nga duna unyay laing bagyo.
***
Segurado na nga 15 ka mga pamuno nasod motambong sa Asean ug East Asian summits dinhi sa Sugbo, matod pa ni Ambassador Paynor.
Mao ni good news, matod pa niya.
Mapuslan na gyud niini ang Cebu International Convention Center.
***
Gidayeg ni Philippine Ambassador to Malaysia Victoriano Lecaros si Cebu City Mayor Tomas Osmeña tungod sa iyang pagpakabana sa lima ka mga babayeng Sugbuanon nga nabiktima sa illegal recruiter didto sa Malaysia.
Matod ni Lecaros, si Osmeña pay mayor nga nagpakita niining maong pagpakabana.
Ning panahon sa Pasko, ang mayor maoy Santa Claus sa lima.
