Saturday, December 30, 2006 Barrita: Sunog, pabuto By Eddie O. Barrita Tikdul-tikdol
ABTIK kaayo si Cebu City Mayor Tomas Osmeña ug si Cebu City Fire Marshal Esmael Codilla sa pagmando sa Unitop branch dinhi sa dakbayan nga ayuhon ang ilang fire exits.
Human kini sa trahedya sa Unitop Ormoc branch nga nikalas og 26 ka mga kinabuhi.
Apan nganong Unitop ra man?
Maayo tingaling susihon ang tanan.
***
Gipakita sa sunog sa Ormoc, nga giingong nagsugod sa pabuto, nga kinahanglang mag-amping kita niini.
Kon mahimo, maglikay kita sa pabuto aron malikay kita sa sunog ug makasugat tas Bag-ong Tuig nga kompleto pang atong mga tudlo.
Bag-ong Tuig, bag-ong kinabuhi.
Di bag-o og address.
***
Samtang gipakita sa sunog sa Capitol compound ang makapasong kainit tali nila ni Cebu City Fire Marshal Codilla ug ni Bureau of Fire Protection deputy regional director for operations Aderson Comar.
Di kaha maayong silang duhay pasiritag tubig sa ilang mga bombero sa di pa sila mokayo?
***
Matod ni Codilla, nagpalapad sa papel si Comar sa pagpamahayag sa media nga gibiyaan lang ni Codilla ang sunog sa Capitol compound human niya ideklarar nga under control na kini.
Niadtos Comar sa fire scene, pero naugdaw lang gihapon.
Maayo pag magnegusyo ning duha og uling.
***
Gidayeg ni President Gloria Macapagal-Arroyo ang desinyo ingon man ang mga muebles sa Cebu International Convention Center (CICC) sa iyang pagbisita niini niadtong miaging Martes.
“This really has the Cebuano character. And the furniture is very beautiful. It’s so beautiful it will knock them (other countries) out,” matod pas presidente.
