Saturday, February 03, 2007 Barrita: Campaign fee By Eddie O. Barrita Tikdul-tikdol
GIBUTYAG ni Maj. Gen. Cardozo Luna, commander sa Central Command (Centcom), nga dunay mga pulitikong nibayad og permit-to-campaign fee ngadto sa New People’s Army sa miaging piniliay. “We know who they are,” matod pa ni General Luna. Apan wa niya nganli. Nganli, General, Sir.
***
Lagmit nga tinuod kining gibutyag ni General Luna kay buhaton sa mga pulitiko ang tanan aron lang modaog sa piniliay. Mao nang way pulitikong moangkon nga napildis eleksyon. Gitikasan lang.
Nitumaw na ang isog nga makisakbang ni Cebu City Mayor Tomas Osmeña sa piniliay karong Mayo.
Si Wendell Lope, 31, taga Barangay Zulueta, dakbayan sa Sugbo, nisang-at na sa iyang certificate of candidacy alang sa pag-kamayor sa dakbayan atubangan sa Comelec.
Ang nakadaot lang, di siya rehistradong botante sa dakbayan.
***
Wa pa sirad-i ni kanhi kongresista Jose “Dodong” Gullas ang kahigayunan nga modagan siya pagkamayor sa dakbayan sa Sugbo batok kang Mayor Osmeña.
Pero daghang naghinamhinam nga motan-aw nga dunay duha ka dagkong mga personalidad nga magsakbang sa pagkamayor sa dakbayan sa Sugbo.
Ingon pas taga Cabadiangan, anhi dinhi makita ang katag.
***
Usa sa una natong namatikdan mao nga mga batan-on maoy magsakbang sa bugnong-lugaynon sa dakbayan sa Mandaue.
Sama sa tandem nila ni Jonkie Ouano pagkamayor ug Councilor Carlo Fortuna pagkabise mayor, Councilor Jonas Cortes pagkamayor ug Councilor Glen Vercede pagkabise mayor. Laing kandidato sa pagka-mayor mao si Vice Mayor Amadeo Seno Jr. Paabuton nato ang pagsubang sa usa ka bag-ong bituon sa Mandaue.
