Sumala pa ni Mayor Tommy, wa masud sa iyang hunahuna nga padaganon pagkamayor si Cebu City First Lady Margot Osmeña taliwa sa mga huhungihong nga si Margot maoy mohulip kaniya.
Kon di mo motuo, paminawa si Margot: Why don’t you believe Tommy? If I had any interest in running, I would tell you and I don’t have.
Tuo na lang mo, si Margot na gud na.
*** Nagtuo si Mayor Tommy nga kon si Atan Guardo modaug batok kang Rep. Tony Cuenco sa Cebu City south district, si Atan maoy makigharong kang Mike Rama sa pagka mayor sa dakbayan sa piniliay sa 2010.
Kon mao ni, maningkamot gyud si Mike Rama nga modaug si Tony Cuenco.
***
Kinsay nag-ingon nga ang Pilipinas di mahimong numero uno?
Sumala sa survey nga gihimo sa Political and Economic Risk Consultancy (PERC) nga nagbasi sa Hon Kong, numero uno ang Pilipinas.
Numero uno lagi, pero sa pangurakot ug pangikik.
***
Tungod niining survey sa PERC, di na ikahibung nga nisulbong ang presyo sa mga decorative lamppost ug mga suga ngadto sa P85,000 hangtod sa P350,000 matag usa.
Ang nakamahal niini mao nga ang mga lamppost gikapyotan sa mga kikik.
***
Nabayran na diay ang mga lamppost nga mokabat sa P120 milyunes, matod pa sa Department of Budget and Management (DBM).
Ang nahibilin na lang, matod pa sa DBM, mao ang P3.1 milyunes nga retention money nga ubos sa balaod di sab mahimong kapugngan sa pagbayad.
Ingon pas taga Cabadiangan, ang mga imbestigador sa overpriced lamppost mora na lang og naggukod sa ilang kaugalingong anino.
