Saturday, March 31, 2007 Barrita: Vote buying By Eddie O. Barrita Tikdul-tikdul
IPAHUNONG ni Cebu City Mayor Tommy Osmeña ang bisan unsang matang sa vote buying, ilabi na sa south district diin si Rep. Tony Cuenco giatbangan ni magpapatigayon ug sports patron Atan Guardo.
Mapalit bang boto og tambal sa reyuma ug arthritis?
Kuyaw kon human sa eleksyon mobalik og tukar ang sakit sa lutahan.
***
Magbutang si Mayor Osmeña og anti-vote buying team sa south district.
“We’ll make the people aware that Cebu is the last place in the Philippines where there will be vote buying,” nagkanayon ang halangdong mayor.
Giingnan na bitaw na sila ni Tony Cuenco nga “the south district is not for sale.”
***
Naanad na ang mga botante niining vote buying kay nakahibawo silang mao ra ning higayona nga makadawat silag kuwarta gikan sa mga pulitiko.
Kon modaog na gud ug makalingkod na sa puwesto, makalimot na sila sa ilang mga gisaad ngadto sa katawhan.
Maong napagya na ang kinamangay sa gabii dayon na sa piniliay.
Apan bisan unsa ka daghan og kuwarta, mapildi gihapon kon koprason lang.
***
Mingaw ang umaabot piniliay sa una ug ikalimang distrito sa lalawigan sa Sugbo kay hayan way madagan batok nila ni Rep. Eduardo Gullas ug Rep. Red Durano.
Apan si Cebu Gov. Gwen Garcia nakapag na gyud og arisgadong makigbatok kaniya--–si Mary Joyce Osmeña.
Matod ni Mary Joyce, naahat siyag dagan pagka gobernador kay way bisan usa sa mga Osmeña nga nibarog batok kang Garcia.
***
Gikatahong nagtampunsisok ang mga pulitiko sa mga buhatan sa Commission on Elections (Comelec) niadtong Miyerkules aron sa pagduso sa ilang certificates of candidacy.
Matod ni Comelec 7 Regional Director Rene Buac, tungod tingali ni kay petsa 28 man ug daghang nagtuo nga ang numero otso sumala sa feng shui magdag suwerte sa mga kandidato.
