Saturday, April 21, 2007 Barrita: Kalma lang By Eddie O. Barrita Tikdul-tikdol
GIPALIHOK ni Acting Cebu Provincial Police Director Carmelo Valmoria ang Task Group Hope (Honest, Orderly and Peaceful Election) didto sa Bantayan aron pagpabugnaw sa nagkainit nga politika sa maong isla, labi na sa lungsod sa Madridejos.
Hangyo ni Col. Valmoria sa mga supporters, kalma lang, “dili mag-init kay ang mga kandidato dili man sila ingon ana.”
Samtang nagkaon kag buwad danggit, di kang katuo nga ingon diay ana kainit ang politika sa gigikanan niini.
***
Ang mga kandidato sa isla sa Bantayan nipirmag usa ka peace covenant ug nisaad nga: “avoid at all cost the use of force, intimidation, fraud and violence for the advantage of their political interest.”
Porbida. Wa na lang gyud nila klaruha nga di sila mogamit og pusil.
Tan-awa, usa ka adlaw human nila pirmahi ang peace covenant, dunay nangampanya nga girakrakan didto sa Madridejos.
*** Supak si Atan Guardo, kandidato sa pagka kongresista sa Cebu City south district batok ni reelectionist Rep. Tony Cuenco, sa laraw nga padad-an og 50 ka mga pulis ang mga bukirang barangay sa dakbayan.
Matod niya, mosangpot lang kini sa usa ka duguong panagsakbang sa duha ka armadong pundok.
Karon pa ko kahibawo nga maggubot diay ang kabukiran kon padad-an og mga pulis.
***
Morag giganahan na si magpapatigayon Cris Saavedra niining iyang bag-ong papel nga gida isip usa ka anti-graft crusader.
Una niyang gibirahan ang mga overpriced lamppost ug mga streetlight nga nisangpot sa pagkasuspenso nila ni Mandaue City Mayor Teddy Ouano ug Lapu-Lapu City Mayor Boy Radaza ug sa laing 17 ka mga opisyales.
Sunod niyang target mao ang Cebu International Convention Center kay matod niya overpriced sab ni sa kantidad nga P515 milyunes.
***
Wa abtig walo ka oras, nasikop sa kapulisan ang tulo ka tawo nga nitulis sa usa ka pawnshop didto sa Pardo, dakbayan sa Sugbo.
Nasikop sab ang giingong mastermind ug ang inahan niini nga giingong nitabang sa mga gikatahapang tulisan.
Kon ingon niini kaabtik ang mga pulis, mahipos na gyud sa hangtod ang mga vigilantes.
Di ba, Col. Pat Commendador? —Sun.Star Superbalita [Cebu]
