Saturday, May 05, 2007 Barrita: Cell phones ug tikas sa piniliay By Eddie O. Barrita Tikdul-tikdol
GIDILI sa Commission on Elections (Comelec) ang paggamit sa mga cell phones nga dunay camera ingon man sa mga digital cameras sud sa polling precinct atol sa piniliay karong Mayo 14.
Matod pa ni Comelec chair Ben Abalos, mahimong gamiton ang mga cell phones ug mga digital cameras sa pagkuhag hulagway sa balota ug ipakita kini ngadto sa namalit og buto.
Laing paagi sa pagtikas sa piniliay mao ang pagbutang og indelible ink sa kuko niadtong botante kansang buto ilang napalit apan tua laban sa pikas kandidato.
Kon napalit na, butangan dayon og indelible ink and kuko aron di na makabotar.
Maayo lang kon ang botante anaa sa usa ka distrito nga gimarkahag not for sale.
***
Minilyon sa mga kaigsuonan natong Pilipino nanglarga sa gawas sa nasud aron makatrabaho ug mas daku pang suweldo.
Matag tuig, magpada silag kuwarta sa ilang pamilya og mga paryente nga mokabat og $12 bilyunes nga nakatabang sa pagpabarog sa atong ekonomiya.
Tungod niini, gihatagan silag katungod sa pagbuto bisan tua silas gawas sa nasud kay halayo sila sa panikas ug pinalitay sa mga politiko.
Apan singko porsento ray namotar sa atong mga absentee voters.
***
Matod pas Department of Labor and Employment (Dole), adunay 100,000 ka bakanteng trabaho sa information and technology (IT) sector sama sa mga call centers dinhi sa Pilipinas.
Daghang bakante tungod kay dyutay ra man ang qualified sa maong mga trabaho.
Resulta na ba ni sa brain drain?
***
Sumala sa usa ka taho sa Reuters, hilabihan ka stressful ang trabaho sa mga call centers kay daghang mga callers nga abusado.
Nisangpot kini sa mga trabahante nga palainom, hinabako ug kusog moinom og kape.
Angay kining tan-awon sa mga opisyales sa Dole.
***
Niinsistir gyud ang mga kadagkuan sa Philippine Air Force (PAF) nga ang nylon nga higot sa tabanog maoy hinungdan sa pagkahagsa sa usa ka UH-1H Huey helicopter niadtong Sabado didto sa Mactan.
Kon mao ni magbantay ang atong mga piloto kay mahitabo unya nga ang atong air force pulos na lang mga piloto, wa nay helicopter.
***
Tulo ka mga tawo nasikop ug gibilanggo tungod sa pagpangawat sa mga alambre sa giingong overpriced lampposts nga gitaod alang sa Asean summit didto sa Lahug, dakbayan sa Sugbo.
Mas una pa silang nabilanggo kay niadtong mga opisyales nga nakasapi sa pagpalit sa maong mga lampposts.
