Tuesday, May 08, 2007 Obenieta: Taliwala sa uraray ug aray By Myke U. Obenieta Pungko-pungko
MAIHAP na lang sa tudlo, hapit na gyud makitang’ katag.
Lagmit naghuot na ron ang alingagngag sa pulitiko nga wala’y kalainan sa binatilyo nga naninguhang dawaton sa gihalaran sa iyang dughan. Gikulbaan ug gakurog na ron ang iyang bag-ang kon siya nangutana: “Sugton ba kaha intawon ko sa gihalaran ning dughan? Dili ba kaha bastid, pastilan?”
Pipila ka piyong na lang, ug mosanag na ang adlaw sa mga mananaog sa piniliay. Ug samtang ang tuktogaok sa mga manok susama ra sa kakha-tukang paningkamot sa mga kandidato aron sila dili ihawon, nagkainit na pud ang kinamangay alang sa pagsakmit sa atong pagsalig.
Harana diri, harana didto. Ingon niini ang alingugngog sa pagilok ug palami diha sa nagkalain-laing mga “campaign jingles.” Bitaw, susama bitaw sa kagalante ug kaalegre sa pangampanya ang palakat sa romansa sa ulitawong buot mangasawa.
Kining panahom mao’y nasiplatan, punting kaayo sa paniid ni Joe Torres—usa ka tigpamahayag—nga napatik bag-ohay lang sa GMA-7 Bloggers’ Network. Giulohan og “Ligawan at Eleksyon,” ania ang hubad sa iyang Tinagalog nga panglantaw:
“Wala’y kalainan sa pagpanguyab ang piniliay. Usahay lingaw. Usahay banha, samok. Usahay mabulokon. Usahay lisod pamatud-an ang tim-os nga paghigugma. Nagkayamukat ang mga saad. Kasagaran daghan ang nakalimtan nunot sa pagkuha sa buot angkonon.
Sa panahon sa pagpanguyab, gipangandaman ang pagkab-ot sa langit ug yuta. Apil na ang buwan ug kabitoonan buot tughiton aron madani gyud ang gipaurarayan. Apan kon magkatakdo na, kon makuha na ang gitinguha, kon tiaw lang ang gugma, inig abot sa pipila ka buwan, nunot sa pagburot sa tiyan, likay-likayan lang lakip ang anino…
Samtang nanguyab nato ang mga politico ug sa umaabot nga piniliay sa Mayo, dili unta kita magpadala sa matam-is nga sinultihan, sa mga mabulokon nga buwak nga gipangdalit ug mga padanlog nga gipangtunol gikan sa nagpaka-aron-ingnon nga tinuod ang ilang paghigugma. Dili ilaha ang atong mga kasingkasing, mao nga dili gyud nato basta na lang itugyan ang atong pagkatawo.
Botar nga duna’y igong kahibalo. Pamalandong sa dili pa itugyan ang bandera sa Bataan, matod pa.
Sama sa kalambigitan sa nagminahalay, kaugmaon nato ang nagkumbitay sa umaabot nga piniliay. Sama sa pakighilawas, pagmatngon batok sa “casual sex.” Lisod ang panahon karon. Daghan ang nagmasakiton ug naalaot kay wala maghunahuna. Bug-at nga pas-anon ang pagtukod og banay labi na kon dukirok ang imong maminyoan. Mao na nga ayaw gyud pagpadala sa kainit sa pus-on. Ayaw pagpadala sa ilusyon nga, dinhi sa atong nasod, kanunay mao ra’y buot ipasabot sa piniliay.”
Bitaw, kon humok kag ilong isip botante, aw, andam man kaha ko mosimhot sa kaugalingong’ utot nunot sa imong pagkasikwate?
