Morag nagpanagana lang ang taga Comelec nga ibutang na sab sila ubos sa “citizen’s arrest.”
***
Nagpabiling kulbahinam kinsay modaog nga kongresista sa ikaupat nga distrito sa lalawigan sa Sugbo tali nila ni Benhur Salimbangon ug Bogo Mayor Celestino Martinez III.
Wa pa sab matagad ang 15 ka mga contested ERs sa Bogo kansang canvassing nagbalhin-balhin gikan sa Bogo ngadto sa Kapitolyo, buhatang rehiyonal sa Comelec ug karon tua na sa Comelec Manila.
Resulta na ni sa “serious doubts” sa authenticity sa maong mga ERs, matod pa sa special board of canvassers.
***
“Hit the ground running,” awhag sa Dilaab Movement ug sa Young United Professionals ngadto sa mga bag-ong napiling mga opisyales.
Matod sa duha ka pundok, kinahanglang unahon sa mga opisyales ang pag-ugmad sa nasod inay manimalos sa ilang mga kaaway sa politika.
Mahibaw-an bitaw ni nato kinsay di maisyuhan og business permit.
***
Matod pa ni Cebu City Election Officer Marchel Sarno, nagpasagad lang og object ang mga militanteng party-list groups atol sa opisyal nga canvassing didto sa Comelec Manila.
“Hasta gud result nga dako ang ilaha na object-kan pa,” ingon ni Sarno.
Kuyaw diay nga moprotesta silag nganong nakadaog sila.
***
Mokabat sa 1.2 milyunes o 77.09 porsento sa 1.6 milyunes ka mga rehistradong botante sa lalawigan sa Sugbo nibotar sa niaging eleksyon.
Timailhan ba ni sa pagkahingkod na sa mga Sugbuanon sa politika?
Maayo tingaling pangutan-on kadtong namalit og boto apan pildi lang gihapon.
***
Bisan pag nahospital si Cebu City Mayor Tomas Osmeña tungod sa usa ka minor surgery, nagpadayon gihapon siyag trabaho didto sa iyang hospital bed.
Nagpakita lang ni nga si Mayor Osmeña usa ka workaholic.
