Saturday, June 30, 2007 Barrita: CICC ug SRP By Eddie O. Barrita Tikdul-tikdol
NIAWHAG si Capitol information consultant Rory Jon Sepulveda kang Cris Saavedra nga di lang kay ang Cebu International Convention Center (CICC) maoy iyang utingkayon, ipaapil sab ang South Road Properties (SRP).
Maglisod si Cris og kubkob sa mga bato, graba, anupog ug bas nga gidan-ok sa dagat aron paghimo sa SRP.
Lisod tandi-on ang CICC nga usa ka building ug ang SRP nga yuta pa lang.
Ang CICC, kansang kantidad hayan mosulbong ngadto sa P800 milyunes, gitukod ginamit ang nagbahang sapi sa Kapitolyo.
Samtang ang SRP giutang gikan sa Japan Bank for International Cooperation nga karon niburot ngadto sa P6.3 bilyunes.
***
Matod pa ni Cebu Gov. Gwen Garcia, hypothetical lang ang balor nga P800 milyunes sa CICC kay base sa usa ka construction handbook, ang building sama niini mobalor man og usa ka bilyon ka pesos.
Kon pun-an pa diay og P200 milyunes, mainsakto na gyud ang balor sa CICC.
Pero di na kagukod ang CICC sa balor sa SRP.
***
Nipasalig si Garcia nga kadtong mga banay nga nagpuyo sa mga luna sa yuta sa probinsya dinhi sa dakbayan sa Sugbo di malabay sa daplin ug way kapaingnan.
Maayo na lang kay wa sila mangapagan sa panagbangi tali ni Garcia ug Cebu City Mayor Tomas Osmeña.
***
Namahayag si manlalaban Augusto Go, presidente ug founder sa University of Cebu, nga nabalaka na ang mga magpapatigayon niinging panagsungi tali sa mayor ug gobernador.
Sagdi lang kay matod pa bitaw sa Ecclesiastes, dunay panahon alang sa tanang butang ug panahon alang sa tagsa-tagsa ka tuyo ilawom sa langit.
Panahon pa ron sa panag-away.
Mosunod kahang panahon sa kalinaw?
***
Gihimakak ni Cebu Provincial Board Member Luigi Quisumbing nga nigasto giyag P150 milyunes sa iyang kampanya sa pagka kongresista sa ikaunom nga distrito sa Sugbo sa niaging piniliay.
