Saturday, July 07, 2007 Barrita: Drama sa Bogo By Eddie O. Barrita Tikdul-tikdol
NAGPABILING kulbahinam kinsay modaog sa pagka kongresista sa ikaupat nga distrito sa Sugbo tali nila ni Benhur Salimbangon ug ni Celestino Martinez III.
Ang Commission on Elections Second Division niluwat nag ruling nga fake ang 15 ka mga election returns gikan sa Bogo.
Apan wa pa matuki kon kinsa unta ang makabenepisyo sa maong fake nga mga election returns.
***
Ang kalangay sa inihapay sa boto sa ikaupat nga distrito nagpakita lang sa panginahanglan sa usa ka computerized elections.
Pero, klaruhon sab nga way computerized cheating.
***
Ang pundok nga Dilaab maghalad og misa karong Hulyo 14 didto sa St. Joseph’s Parish sa Mabolo, dakbayan sa Sugbo aron maundang ang panagbangi tali ni Cebu City Mayor Tomas Osmeña ug Cebu Gov. Gwen Garcia.
Maundang kaha?
***
Matod pa ni Fr. Carmelo Diola, ang ubang mga sugyot sa paghunong sa panagbingkil sa duha ka mga pangulo sa Sugbo mao ang matag adlaw nga pangadye, pagpahilum sa duha ug voluntary media gag.
Kon di na sila maningog, way mogawas sa media.
***
Nabalaka na ang mga tag-iyag luna sa yuta sud sa Talamban cluster lakip sa Banilad diin dunay moratorium sa tanang mga proyekto gawas lang sa “single-family homes.”
Matod ni Mayor Osmeña, mao kini ang business risk sa namalit og yuta sa maong dapit.
Mao nay business risk kon ang imong yuta nahimutang duol sa Ciudad project sa Kapitolyo.
***
Namahayag si Justice Secretary Raul Gonzalez nga ubos sa Human Security Act, ang si bisan kinsa, lakip ang mga peryodista, mahimong i-wiretap kon suspetsado silang terorista ug dunay pagtugot sa Court of Appeals.
Ang balaod kontra sa terorismo, labaw pas terorismo.
***
Karong Sabado, ang petsa motakdo nga 7/7/07.
Kining petsaha, alang sa mga numerologists, maoy numero nga magdag suwerte mao nga didto sa Estados Unidos, mokabat sa 70,000 ka kasal ug fully-booked ang mga casino sa Las Vegas.
