Saturday, September 15, 2007 Barrita: Baha By Eddie O. Barrita Tikdul-tikdol
ANG kapalaran, matod pa ni Machiavelli, sama sa usa ka sapa nga sa panahon sa ting-uwan, mobaha ug moawas sa pangpang.
Ianod sa makusog nga bul-og sa baha ang tanang maagian niini sama sa mga kahoy ug kabalayan.
Sama ra usab sa baha nga nibul-og sa kinabuhi ni kanhi presidente Joseph Estrada nga gikonbikto sa Sandiganbayan sa krimen nga plunder.
***
Apan bisan ingon pa niana kagamhanan ang bul-og sa baha, mahimong kalikayan ang iyang kapintas.
Kay mahimo mang mohiklin kadtong nanagpuyo duol sa tampi sa sapa ngadto sa mas hataas nga lugar aron di sila maanod sa baha.
Sama sab sa paglikay sa mga butang nga namatud-ang nabuhat sa kanhi presidente.
***
Matod pa ni Fr. Joaquin Bernas, usa ka constitutionalist, ang hukom sa kasong plunder ni Estrada igong makapahilak sa usa ka tawong hamtong kay ang pagkabilanggo hangtod sa 40 ka tuig naglakip sa civil interdiction ug perpetual absolute disqualification from public office.
Apan karon nga duna nay nakonbikto sa kasong plunder, kinsa kahay mosunod?
***
Wa mahitabo ang gikahadlokang pag-ulbo sa kaguliyang human sa pagpakanaog sa hukom nga nakonbikto ni Estrada sa kasong plunder.
Tungod niini, nilig-on ang stock market ug ang balor sa piso.
Mao lagi, duna pay kapaingnan ang kanhi presidente ug kini mao ang Korte Suprema.
Kinsay nasayod nga di usbon sa Korte Suprema ang hukom sa Sandiganbayan?
***
Lahi ang pagtan-aw sa mga Muslim clerics niining pagkakonbikto ni Estrada.
Nagtuo silang kabahin kini sa divine wrath tungod kay ang kanhi presidente nagpistag lechon baboy sud sa usa ka Madrasah, usa ka Arabic school human mapukan ang Camp Abubakar gikan sa mga kamot sa rebelding Moro Islamic Liberation Front (MILF) pito ka tuig na ang nilabay.
Pasidaan ni niadtong nakahimog plunder sa di pagkaon og baboy sud sa usa ka lugar nga sagrado alang sa atong mga kaigsuonang Muslim.
