Saturday, September 29, 2007 Barrita: Wa’s libro By Eddie O. Barrita Tikdul-tikdol
NIPASAKAG kasong dishonesty si Senior Insp. Jose Liddawa Jr. batok sa ABS-CBN television crew nga giakusahan nga nangulata kaniya.
Matod pang Noel Archival, abogado ni Liddawa, ang maong kaso one of its kind ug wa’s libro.
Unsaon kaha pagresolve niining kasong wa’s libro?
***
Sumala pas reklamong gipasaka ni Archival ngadto sa tagdumala sa ABS-CBN, ang mga akusasyon batok kang Liddawa wa masubay sa tema sa ABS-CBN nga, “Dapig sa kamatuoran, dapig sa katawhan.”
Pero di dapig sa pulis nga hubog.
***
Nidemanda si Liddawa nga ipakita ang kinatibuk-ang video footage sa hitabo nga nisangpot sa iyang pagkabun-og.
Nahibung tingali si Liddawa nganong siya ray starring sa maong video footage.
Sa pelikula, usahay ang bida maoy magpakulata.
Kinsa may kontrabida sa salida ni Liddawa?
***
Ingon sa wa nay makababag sa piniliay sa barangay ug sa Sangguniang Kabataan karong Octubre 29 kay gisupak sa mayoriya sa mga Senador ang pag-oktaba niini.
Di na mainat ang termino sa mga last-termers nga dina makadagan.
Di na sab mahigawad kadtong mga kandidatong nagpanikad na alang sa piniliay sama ni manlalaban Sisinio Andales nga magpasubli sa pagkabarangay kapitan sa Pahina Central sa dakbayan sa Sugbo.
***
Namahayag si Cebu City Mayor Tomas Osmena nga ang iyang partido, Bando Osmeña-Pundok Kauswagan, di mopadagan ingon man di mopaluyog mga kandidato sa piniliay sa barangay aron mogawas ang tingog sa mga tawo.
Di siya manghilabot sa piniliay labi nag pulos mga sakop sa BO-PK ang magsangka.
Tan-awa lang unya ninyo ang barangay Lahug.
***
Si Cebu Gov. Gwen Garcia ug ang Sugbuanong philanthropist nga si Mariquita Salimbangon-Yeung nahilakip sa 13 nga gipili alang sa “2007 Best Dressed Women of the Philippines.”
Kuyaw ning atong gobernador nga kuhaon pagka-artista o kaha ramp model.
Sa media sa Sugbo, si mayor Ely Baquero, reporter sa Sun.Star, maoy giilang “Best Dressed Journalist” tungod sa iyang 44 ka libel suits.
