Saturday, October 13, 2007 Barrita: Katalagman By Eddie O. Barrita Tikdul-tikdol
NAGSAPAW-SAPAW ang state of calamity sa dakbayan sa Sugbo.
Dunay state of calamity tungod sa pagkuyanap sa dengue ug dunay state of calamity tungod sa malnutrition sa mga kabataan sa 10 ka barangay.
Ang pagsanta ning duha ka katalagman gigastohan sa calamity fund.
Bitaw, lisod kaayo nga ang mga batang maluyahon mao pa gyud ang mataptan sa dengue.
***
Giawhag ni Dr. Susana Madarieta, director sa buhatang rehiyonal sa Department of Health, ang mga local nga kagamhanan sa pagdeklarar sa ilang dapit ubos sa state of calamity aron makapangandam batok sa dengue.
Di na kinahanglang maghuwat, matod niya, nga mokuyanap na ang dengue ug uwahi nang tanan.
Labi na nga kinabuhi sa mga kabataan ang nag-ungaw sa kakuyaw.
***
Daghang nangutana kon di ba makadaot sa turismo sa Sugbo ang pagdeklarar og state of calamity tungod sa dengue. Di, mao kini ang tubag ni Angelita Dy sa Cebu Travel and Tours Association.
Ang madaot kon di masumpo ang dengue.
***
Laing katalagman niigo sa lungsod sa San Fernando, Cebu.
Matod sa walo ka mga konsehal, nagbuot-buot lang ang ilang mayor sa paggastog P400,000 alang sa kampanya sa pagsanta sa dengue.
Apan ang ilang mayor namahayag nga giyak-an sa konseho ang iyang gipangayong pundo batok sa dengue.
Maayo tingaling susihon kon hain ang mas dakong katalagman kay sa dengue, ang mayor o ang konseho?
***
Hangtod karon, wa pay nakaplagang tambal sa dengue.
Dunay nituo sa kaepektibo sa sagbot nga mangagaw, di isip tambal, apan pagpalig-on sa lawas sa kabataan aron makasugakod batok sa dengue.
Nganong wa may pagtuon ang kagamhanan bahin niining sagbot nga mangagaw?
***
Gihagit ni Cebu City Police Chief Pat Comendador ang mga lider sa mga fraternities sa pagpasurrender na lang niadtong ilang mga sakop nga dunay mga warrants of arrest.
Bitaw, maayo pag mosurrender na lang mo.
Kay kon magpadayon mog tagutago, dugay mong hidakpan.
