Saturday, October 20, 2007 Barrita: Barang By Eddie O. Barrita Tikdul-tikdol
NIREKLAMO si Siquijor Gov. Orlando Fua Jr. kay wa siya mahilakip sa mga gobernador ug mga kongresista nga gipanghatagan og P200,000 ngadto sa P500,000 nga cash gift.
Basin gigamyan ra sila sa Siquijor, governor?
O di ba kaha isug lang sila ug wa malisang sa barang?
***
Hasta si kanhi gobernador ug karon Siquijor Rep. Orlando Fua Sr. gilabyan lang sa pagpanghatag og cash gift.
Discrimination ni sa Siquijor nga kay gamay nga probinsya, mas nanginahanglan unta og tabang, matod pang Governor Fua.
Anhi na tingali dinhi maprobahan unsa ka epektibo ang barang.
***
Bitaw, tiaw mog nakadawat pa silang duhag tag P500,000, dako na kaayo nig ikatabang sa mga Siquihodnon.
Wa pa ko kataak bisan makausa sa lalawigan sa Siquijor. Apan matod pas nakaadto nas Siquijor, makabibihag ang katahum sa ilang kabaybayonan ug kadagatan.
Apan maoy nahibaw-an sa mga langyaw ang ilang nabaniog nga abilidad sa barang.
***
Nasikop sa mga sakop sa Criminal Investigation and Intelligence Bureau (CIIB) si Paulo “Intot” Calunsag, usa ka gikatahapang level one drug pusher nga makabaligyag duha ka kilong shabu matag semana.
Nalutsan nila ni Senior Insp. George Ylanan sa CIIB ug ni Cebu City Police Office Deputy Chief for Operations Supt. Pablo Labra II ang mga security cameras sa balay ni Calunsag.
Tan-awa, kon molihok lang ang kapulisan, di sila magsalig sa mga vigilantes.
***
Nasakmit gikan sa panimalay ni Calunsag ang balor P2 milyunes nga shabu ug cash nga P1 milyunes.
Apan namasangil si Calunsag nga giplanteran lang siya sa mga pulis nga nagdalag shabu sud sa Tupperware.
Mahalon ra sab nang Tupperware. Bulsita pa hinuon, motuo ko.
***
Matod ni Colonel Labra, maoy naandan sa mga nasikop sa paghupot ug pagpayuhot og illegal drugs ang pagpasangil sa kapulisan nga giplanteran sila.
Kon tinuod, mahimo silang mopasakag kaso batok sa pulis nga naghimo niini.
Kon di gani tinuod, manghinaut na lang si Colonel Labra nga “kilatan si Calunsag.”
