Saturday, November 03, 2007 Barrita: Kalag-kalag By Eddie O. Barrita Tikdul-tikdol
KARONG adlawa mao ang All Souls’ Day, ang adlaw sa mga minatay.
Karong adlawa na lang sab kutob ang promo sa usa ka punerarya, St. Peter Chapels, sa 50 porsyentong discount.
Pait lang ning promoha kay kinahanglan kang mamatay aron makapahimus ka.
***
Dunay usa ka butang sa kalibotan nga ang mogamit di makapili.
Mao kini ang lungon.
Kay kon patay ka na, di na ka kapili sa imong lungon, di ka na magpadiki-diki kay mangita pag mas nindot ug moingon ka nga mobalik ka lang kon di makakitag lain.
***
Ginaingon nga death is the greatest leveler kay mao kini dangatan sa tanan, kabus ug adunahan, hari ug ulipon.
Pero kon moadto kas mga menteryo, makita gihapon nimong kalainan.
Ang mga adunahan dunay mosuliyo samtang ang mga kabus anaa sa mabugnawng lubnganan nga hayan lakad-lakaran lang sa katawhan.
Apan pareho silang nibiya sa mga kaguol, mga kahisagmuyo ug mga kabalisa sa kalibotan sa mga buhi--–pulos na nagngisi ang ilang mga kalabera.
***
Daghang mga opisyales ang nagsigeg tagawtaw nga nasudlan na sa narco-politics ang piniliay sa barangay ug sa Sangguniang Kabataan (SK).
Apan bugtong si Carreta Barangay Captain Marciano Ando pay nipasakag kaso atubangan sa Commission on Elections batok sa iyang kaatbang, si Eduardo Lauron Sr., nga nidaog sa miaging piniliay ug matod niya gipaluyohan sa usa ka drug lord.
Kon duna pay drug lord sa Carreta, timailhan na nga pakyas ang mga opisyales sa barangay sa pagpuhag sa mga tigpayuhot og ginadiling druga.
***
Di lang ang barangay Carreta ang giingong nasudlan sa narco-politics.
Matod pa ni Lorega-San Miguel Barangay Captain Fortunato “Tingting” Parawan, nga napildi sa eleksyon, nagbaha ang kuwarta gikan sa usa ka drug lord sa miaging piniliay ug gihulga pa ang mga botante.
Maayo tingaling maminaw sab ta niadtong nakadaog sa miaging piniliay kon tinuod bang dunay narco-politics. --Sun.Star Superbalita [Cebu]
