Saturday, November 17, 2007 Barrita: Bomba By Eddie O. Barrita Small Bites
GIHIMONG habal-habal ang mga motorsiklo aron kasakyan sa mga pasahero ngadto sa mga lagyong lugar samtang ang uban gitaoran og sidecar ug gihimong tricycle.
Ning ulahi, usa ka motorsiklo gitaorag bomba nga gipaulbo didto sa sud sa Batasan complex ug nakapatay sa usa ka kongresista ug laing tulo ka mga tawo ug nakaangol sa labing menos napulog duha, lakip ang duha ka mga kongresista.
Nitunga na karon ang motorcycle-bomb.
***
Kaniadto, lusot-lusot lang ang mga motorsiklo sa mga security checks kay way nagdahom nga mahimo kining gamiton sa pagpaulbog mga dagkong building.
Karon, kining paboritong sakyanan sa mga vigilantes ug mga tulisan angay nang bantayan.
Kay mas barato ra ba ni kay sa car-bomb.
***
Wa pa maklaro sa mga tinugyanan sa balaod kinsay nagpabuto sa bomba didto sa Batasan complex.
Apan ang mga pasiunang theory nagtumbok nga ang target mao si Basilan Rep. Wahab Akbar nga namatay sa maong hitabo.
Si Akbar usa ka kanhi kumander sa Moro National Liberation Front (MNLF) nga nagpasakop sa bandidong pundok nga Abu Sayaff apan nibali ug nipaluyo sa mga military operations batok sa maong pundok.
Ang pangutana, nganong didto man gyud siya birahi sa Kongreso?
***
Wa malisang ang mga kongresista sa pagbuto sa bomba ug gipadayon nila ang ilang sesyon pagkasunod adlaw.
Unsay sangputanan?
Gisalindot ang laing impeachment batok kang Presidente Gloria Macapagal-Arroyo.
***
Giawhag ni Cebu City Mayor Tomas Osmeña ang konseho sa dak-bayan sa pagpasar og resolusyon nga magpahunong sa kasamtangan sa development sa joint project sa Ma. Luisa Estate Park ug sa Kapitolyo.
Matod ni Osmeña gitumong sa paglikay sa pagbaha sa ubos nga dapit sa dakbayan.
Kon mao na, seguradong aprobahan ni sa independenting konseho sama sa ilang pagpahunong sa Ciudad project sa Kapitolyo kay makapasamot sa kahuot sa trapiko sa Banilad-Talamban area.
