Saturday, December 08, 2007 Barrita: Dinamita By Eddie O. Barrita Tikdul-tikdol
USA ka mangingisda namatay samtang ang iyang anak hayan nga mabuta tungod sa mga samad nga naangkon human sila mabuthi sa dinamita nga gamiton unta sa illegal nga pangisda didto sa kadagatan sa Barangay San Vicente sa isla sa Olango, dakbayan sa Lapu-Lapu.
Nakabawos ang mga isda.
***
“Maningil gyud ang Kinaiyahan,” matod pa ni Edilberta Eyas, ang community development coordinator sa Olango Bird Sanctuary.
Sa ato pa, angay magbantay kadtong nagsigeg pangdinamita.
Kay di sa tanang adlaw nga ang mga isda maoy hibuthan.
***
Ang maong hitabo nagpakita nga duna pay mga mangingisda nga wa motagam niining pagpangdinamita.
Duna gihapoy wa masayod unsa kadako sa kadaot nga mahimo sa dinamita sa kalikopan, ilabi na sa mga gasang nga itloganan sa isda.
Usahay sab, hilabihan kapait sa leksyon sa kasinatian nga nahia-guman.
***
Angay nga gukdon sa kapulisan ug sa mga tinugyanan sa Bantay Dagat di lang kadtong nigamit gihapon niining illegal nga pamaagi sa pangisda, kon di, hangtod kadtong nanaghimo ug namaligya niining mga blasting caps ug uban pang mga sangkap sa pabuto.
Lahi ra gyud sa diha pa ang maisog ug maabtik nga pangulo sa Bantay Dagat, si anhing Jojo dela Victoria.
***
Wa na diay pundok sa Bantay Dagat ang dakbayan sa Lapu-Lapu.
Ang gitahasan karon sa pagbantay sa mga dinamitiro sa kadagatan palibot sa mga isla sa Mactan, Olango ug uban pa mao ang mga sakop sa Olango Police Station ug ang mga sakop sa City Fisheries and Aquatic Resources Council.
Abtik ra ba nang mga pulis sa Olango, abtik manakop sa mga hapon nga maghimog sex video.
***
Pasidunggan ni Police Regional Office (PRO) 7 Director Ronald Roderos ang mga pulis nga nakasigmit ni Aristotle Aves, ang gikatahapang hitman sa usa ka fraternity ug giingong maoy responsable sa mga drive-by shootings dinhi sa dakbayan sa Sugbo.
Gawas sa medalya, i-recommend pa gyud sila alang sa spot promotion.
Maayo na lang kay ang mga pulis maoy nakauna sa pagsigmit ni Aves, di ang mga vigilantes.
