Saturday, December 15, 2007 Barrita: Pan de sal By Eddie O. Barrita Tikdul-tikdol
NIUMENTO ang presyo sa pan de sal, ang paboritong pan sa kadaghanan, gikan sa P2 ngadto sa P2.25 o kaha P2.50 ang buok tungod sa pagsaka sa presyo sa harina.
Manghinaut lang ta nga wa sab nila pagamyi ang pan de sal.
Lisod na kon mogamit pa tag lente aron atong makit-an ang pan de sal.
***
Dugay nang pugong-pugong sa mga bakeshops nga di mosaka ang presyo sa pan apan di na gyud nila kapugngan.
Matod pa ni Roberto Gandionco, chairman and chief executive officer sa Julie’s Bakeshop, hayan nga di kini mao ang katapusang umento sa presyo sa pan kay sigeg saka ang presyo sa harina.
Kon di na gyud ta kapalit og pan, mag-agwanta na lang tag tinughong nga bahaw.
***
Sumala sa nasudnong pundok sa mga bakeries, mas dako pa unta ang umento sa presyo sa pan kon wa pa molig-on ang balor sa peso batok sa dolyar kay ang atong harina gipalit man gikan sa gawas sa nasod.
Gawas sa presyo sa pan, hayan nga mosaka sab ang presyo sa ubang mga produkto nga naggamit og harina.
Kon nireklamo ka kaniadto nga ang pansit way subak, ayaw na lag reklamo kon sa sunod ang pansit wa nay miki.
***
Nasiak na ang pagkontrolar sa Bando-Osmeña Pundok Kauswagan (BO-PK) sa Association of Barangay Councils (ABC) sa dakbayan sa Sugbo.
Duha nay ilang kandidato sa pagkapangulo sa ABC---si Talamban Barangay Captain Alvin Arcilla nga giindosar ni Cebu City Mayor Tomas Osmeña ug si Guadalupe Barangay Captain Jingjing Faelnar nga bag-o lang ni u-turn human kusganong niingon nga di na modagan.
Kon gipasagdan pa lang sila, sumala sa gipangayo ni Basak Barangay Captain George Rama, di unta mahibaw-an nga nabungkag na sila.
***
Si George Rama maoy nihangyo ni Jingjing Faelnar nga magpasubli isip pangulo sa ABC.
Apan nihukom si Jingjing sa pagpasubli human niya madawat ang hukom sa Commission on Elections (Comelec) Second Division nga nagsalindot sa disqualification complaint batok kaniya.
Di na siya mahadlok nga ang pangulo sa ABC i-disqualify sa Comelec.
