Saturday, December 22, 2007 Barrita: Session hall By Edddie O. Barrita Tikdul-tikdol
HAMUGAWAY ug luho ang bag-ong session hall sa Cebu City Council diha sa bag-ong gisubhan nga legislative building sa dakbayan sa Sugbo.
Angayan na unya kaayo ang mga talahurong konsehal nga magsesyon kon isalida sa cable television.
Mao tingali sab ni ang usa sa mga hinungdan nga magpasubli si Guadalupe Barangay Captain Jingjing Faelnar pagka-presidente sa Association of Barangay Councils.
Kana lagi kon di mabaraw ni manlalaban Salvador Solima.
***
Mokabat sa P120 milyunes ang nagasto sa kagamhanan sa dakbayan sa Sugbo sa pag-renovate sa legislative building.
Matod pang Cebu City Vice Mayor Mike Rama, gikinahanglan ang maong renovation aron pagpabalik sa kahalangdon sa City Hall: “The need to renovate is not a luxury but a rightful attempt to restore the dignity in the office of men and women whom the people of Cebu elected into office.”
Ilabi na sa tuig 2010.
***
Nabalaka si Cebu City Mayor Tomas Osmeña unsaon nila pagbayad ang mga magbubuhis sa dakbayan sa dakong kantidad nga nagasto sa pag-renovate sa legislative building.
Matod pa niya, “How are we going to repay the taxpayers?”
Nagduda kong ang iyang gikabalak-an mao nga ang mga konsehal nga bag-o nag session hall ug mga opisina di na unya mopatuo niya.
Kon mao na, sayon kaayong pagbayad sa mga magbubuhis--–patuo lang mo niya.
***
Namahayag si Mayor Osmeña nga makapahimulos na gyud ang dakbayan sa Sugbo sa mga bunga sa South Road Properties (SRP) ug ang dakbayan mao na unya ang kasinahan sa ubang mga dapit sa nasod.
Mahinayon na gyud unya nga ang dakbayan sa Sugbo mahimong “second to none.”
***
Gihangyo ni Cebu Archbishop Ricardo Cardinal Vidal ang mga Sugbuanon nga motabang kaniya sa pagpapas sa imahen sa Sugbo nga usa ka “killing field.”
Sagdi lang talahurong cardinal, kay ingon sa nipahuway ang mga vigilantes sa dihang nahimong hepe sa kapolisan sa dakbayan si Col. Pat Comendador.
Ingon sa nahumong sab ang gubot sa mga fraternities human sa pagkasikop ni Aristotle Aves ug sa iyang mga hinanib.
