Saturday, May 24, 2008 Barrita: Death penalty By Eddie O. Barrita Tikdul-tikdol
GUSTONG banhawon ni Sen. Juan Miguel Zubiri ang death penalty human sa pagmasaker sa 10 ka mga tawo atol sa tulis sa bangko didto sa Cabuyao, Laguna.
Apan matod pang Cebu City Mayor Tomas Osmeña, nga niklarong di siya pro-vigilantes, mas epektibo ang mga vigilantes kay sa death penalty.
Epektibo kay ang vigilantes maoy piskal, huwes ug executioner.
***
Ang problema sa pagpahamtang sa death penalty, matod sa halangdong mayor, mao ang atong legal system.
Kadtong makonbikto ug silotan sa kamatayon mamatay na lang sa atake sa kasingkasing sa di pa siya bitayon o ibutang sa
lethal injection.
Ingon niya, mas maayo ang mga vigilantes kay inig gawas gyud sa suspetsadong kriminal sa prisohan kay nakapyansa, bisag wa pa makonbikto, patyon dayon.
***
Nikunhod ang gidaghanon sa krimen dinhi sa dakbayan sa sugbo balig 43 porsento ubos ni Cebu City Police Director Pat Comendador.
Unsay hinungdan?
Nitrabaho lang ang mga pulis sa angay nilang trabahuon ug wa sila magsalig sa mga vigilantes.
***
Matod pa ni Col. Comendador, di masukod kon makapakunhod ba o makapaumento sa gidaghanon sa krimen ang vigilantism.
Sa sinugdan, mahimo kining epektibo apan sa magkadaghan na ang gitumba sa mga vigilantes, mosaka sab ang gidaghanon sa mga krimen ug moubos ang crime solution efficiency.
Mao na nga nikunhod ang krimen sa dihang nibakasyon ang mga vigilantes.
***
Wa pay bisan usa sa mga vigilantes nga nasigmit.
Mokabat na sa 180 ka mga ex-convicts ug mga sus¬pet¬sadong kriminal ang ilang gipangtumba.
Unsa kaha no kon dunay madakpan unya mahibaw-an nga ang vigilantes pulis usab diay?
Matod pang Col. Comendador, ilang ra sab nga tratahon sama sa pagtratar nila sa ubang mga kriminal.
***
Angay natong usisahon og maayo kining giingon ni Col Comendador nga nikunhod ang krimen sa dakbayan sa Sugbo nunot sa pagbanhig ug pagpatay niadtong Miyerkoles kang manlalaban Richard Sison, abogado ni Lapu-Lapu City Mayor Arturo Radaza.
Di kalikayan nga makapangutana kita, mag-unsa man kon nikunhod ang krimen apan di luwas ang atong kadalanan?
Usapa nang statistics.
